InfoHub Logo

Pavlodarlyq oqýshylar múgedek balaǵa qýanysh syılady. Olardyń qoldan qurastyryp, 3D prınterinde basyp shyǵarǵan mehanıkalyq protezin segiz jastaǵy Sasha Sokolov synaqtan ótkizbek.

Bir qyzyǵy, jas ónertapqyshtar jasandy qoldy qurastyrǵanda eshqandaı arnaıy quraldyń kómegine júginbegen, dep jazady 24.kz. Týa bitti dene kemistigi bar Sasha úshin bul protez aýadaı qajet. Oıyn balasy sol qolyndaǵy saýsaqtarynyń joqtyǵynan qıyndyq kórip keledi.

«Basynda qolaısyz bolyp kóringeni ras. Qazir qarasam, myna jerdegi ilgekterin basqalaı ornatypty. Ózime unap tur, ýaqyt óte kele jańa protezge úırenip ketetin sıaqtymyn», - deıdi  2-synyp oqýshysy Aleksandr Sokolov.

Ákesiniń aıtýynsha Sasha buryn da protez kıgen. Biraq ol saýsaqtardyń joqtyǵyn bildirtpeýge ǵana jarapty. Al jańa úlginiń kádimgideı ıkemge keletini kóńilderinen shyqqan.

«Burynǵy protezben bala qolyn qysyp, saýsaqtaryn qımyldata almaıtyn. Al myna protez saýsaqtyń  qyzmetterin tolyq atqarady», - deıdi  Aleksandrdyń ákesi Vácheslav Sokolov.

Qazaq-túrik lıseıinde ınformatıka páninen sabaq beretin Erhan Mindetbaıǵa qol protezin jasaý ıdeıasy kezdeısoq kelmegen. Jeıdesine qolyn jasyrǵan Sashany kóshede kezdestiripti. Protez jasaýyna osy oqıǵa túrtki bolǵan. Al shákirtterimen birlesip jasaǵan jobasy sátti shyqty.

Informatıka pániniń muǵalimi Erhan Mindetbaı: «3D prınteri kelgennen keıin biz birneshe modelderdi jasaı bastadyq. Sáıkesinshe, eń birinshi qaradyq, oıladyq. Eń jaqsy jumys - ol bireýge paıdaly bolǵan jumys. Sashaǵa jasaǵanym, bul eń sońǵy úlgidegi, qolǵa qatty jaqyndaǵan, ıilgishtigi biraz jaqsy kelgen bir protez bolyp otyr. Endi bul oqýshylardyń «protez» dep jasaǵan alǵashqy modeli deýge bolady», - dedi.

«Protezdi jasaýǵa eki aı ketti. Quny 15 myń teńgege tústi. Zamanaýı protezderdiń baǵasy óte qymbat, 30 myń dollardan bastalady. Bizdiki sıaqty mehanıkalyq emes. Batareıa, motorlarmen jumys istegen soń taǵy qosymsha qarajat jumsalady», - deıdi  11-synyp oqýshysy Marat Ábilqaıyrov.

Jas ónertapqyshtar protezdiń jańa úlgilerin jetildirý ústinde. Keleshekte sensorly qurylǵy ornatylǵan, ıyqtaǵy júıke talshyqtarynan kúsh alatyn modeldi jasap kórmek.

---