InfoHub Logo

Búgin Qazaq memlekettik qyzdar pedagogıkalyq ýnıversıtetiniń uıymdastyrýymen bir mezette elimizdiń jeti oblysynda respýblıkalyq «Y. Altynsarın - 2016» pándik olımpıadasy ótti.

Kúndizgi saǵat 12.00-de bastalǵan bilim saıysy 14.00-de aıaqtaldy, - dep habarlady atalmysh joǵary oqý ornynyń baspasóz qyzmetinen.

Olımpıadaǵa orta mektepterdiń 11-shi synybynda oqıtyn 4 myńnan astam oqýshy qyz qatysyp, segiz pán boıynsha baqtaryn synady. Olar: qazaq tili men ádebıeti, orys tili men ádebıeti, aǵylshyn tili, fızıka, bıologıa, geografıa, dúnıejúzi tarıhy jáne hımıa pánderi.

Al Almaty qalasy boıynsha Qyzdar ýnıversıtetinde ótken olımpıadaǵa 500-den astam mektep bitirýshi oqýshylar qatysty.

Óziniń alǵy sózinde osy oqý ornynyń oqý isi jónindegi prorektory Ádilet Toıbaev mektep bitirýshi qyzdardy qos dıplomdy bilim berý baǵdarlamasymen tanystyrdy. 

«Qazirgi tańda ýnıversıtet sheteldik 38 joǵary oqý ornymen, ıaǵnı Fransıa, Túrkıa, Qytaı, Germanıa, Polsha, Sıngapýr, Reseı elderiniń ozyq tájirıbeli ýnıversıtettermen tyǵyz baılanys ornatqan. LAMS Ulybrıtanıa ýnıversıtetimen, Nııde ýnıversıteti men AQSH-taǵy Mıssısıpıı memlekettik ýnıversıtetterimen qos dıplomdyq oqý baǵdarlamasy iske asyrylyp otyr. Osy baǵdarlama boıynsha bitirgen stýdentter eki dıplom alady. Qos dıplomdy bilim berý - qazaqstandyq joǵary bilimniń halyqaralyq bilim berý keńistigine birigýiniń asa mańyzdy kórsetkishi», - dedi ol.

Endi, olımpıadanyń jeńimpazdary men júldegerleri aldaǵy naýryz aıynda anyqtalyp, marapattalatyn bolady. Ár páninen 1, 2, 3 oryndy ıelengen oqýshy óziniń tańdaǵan páni mamandyǵyna saı kelse jáne UBT-ǵa qajetti ótý balyn alǵan jaǵdaıda shákirtaqysyz ýnıversıtet rektorynyń grantyna ıe bolady.

Al, júldeli oryn almaǵandarǵa, biraq Olımpıadanyń deńgeıinen ótkenderge QazMemQyzPÝ-ǵa birinshi kezekte qabyldanýǵa quqyq beretin sertıfıkattar tabys etilip, oqýǵa túsýge 10% jeńildik jasalady. Olımpıada jumysynyń maksımaldy kórsetkishi - 100 bal.

Aıta ketelik, Qyzdar ýnıversıtetiniń rektory, Dınar Nóketaevanyń bastamasymen osymen besinshi jyl qatarynan uıymdastyrylyp otyrǵan bilim saıysynyń basty maqsaty - mektep bitirýshilerge mamandyq tańdaýǵa kómektesý, daryndy oqýshylardy aıqyndaý, jastar arasynda irgeli ǵylymı bilimdi damytý, bilimdi jastardyń óz qabiletterin júzege asyrýyna kómektesý jáne daryndy talapker qyzdardy Qazaq memlekettik qyzdar pedagogıkalyq ýnıversıtetine shaqyrý.

Búgingi Olımpıada Almaty oblysy boıynsha Almaty, Taldyqorǵan, Jarkent qalalary men Raıymbek aýdanynyń Kegen aýylynda; Jambyl oblysy boıynsha Taraz qalasy men Qordaı aýdanynda; Ońtústik Qazaqstan oblysy boıynsha Shymkent pen Túrkistan qalalarynda; Qyzylorda oblysy boıynsha Qazaly, Jańaqorǵan, Qarmaqshy aýdandary men Qyzylorda qalasynda;  Shyǵys Qazaqstan oblysy boıynsha Semeı men Óskemen qalalarynda; Qaraǵandy oblysy boıynsha Qaraǵandy qalasynda jáne Batys Qazaqstan oblysy boıynsha Oral men Atyraý qalalarynda ótkizildi.

inform.kz

---