InfoHub Logo

Petropavldyq áleýmettik jeli qoldanýshylary alǵashqy oqý kúninde balalarynyń satyp alatyn oqýlyqtar tizimin ákelgenin jazyp, narazylyq bildirýde.  Keıbir qalalyqtar birinshi synyp oqýlyqtarynyń 2700 teńgeden satylyp jatqanyn jazýda.

Paıdalanýshylardyń aıtýynsha, mektepte geografıa, aǵylshyn tili, matematıka oqýlyqtary jetispeı jatyr. Eger memleket oqýshylardy oqý quraldarymen qamtamasyz ete almasa, nege jaz boıy aıtyp eskertpegenin ata-analar túsine almaı otyr. Endi balalar sabaqqa esh daıyndyqsyz baryp júr.

Alaıda, oblystyq bilim berý basqarmasy barlyq oqýlyqtardyń alynǵanyn jáne mektepterde tegin taratylatynyn, oǵan aqsha bólip, satyp alýdyń qajeti joqtyǵyn aıtyp baǵýda.

 «Oqýlyqtar jetkilikti túrde satyp alynǵan. Jyl basynda qaıta suryptaý máselesi týyndaıdy. Qazir mektepterde múlikti túgendeý naýqany júrip jatyr. Osydan keıin, bir mekteptegi artyq kitaptar tapshylyq oryn alǵan ekinshi mektepke jiberiledi. Birinshi synyp oqýlyqtaryna keler bolsaq, olardyń oqýlyqtary tolyq kólemde satyp alynǵan. 191 mıllıon teńgege 241 myń dana kitapqa 76 kelisimshart jasalǵan», - dep pikir bildirdi SQO bilim berý basqarmasy materıaldy-tehnıkalyq qamtamasyz etý,qurylys jáne jóndeý jumystary bóliminiń jetekshisi Raýza Elýbaeva.

Tamyz aıynda ákimdik otyrysynda SQO bilim berý basqarmasynyń jetekshisi Sholpan Karınova soltústikqazaqstandyq oqýshylarǵa oqýlyqtar men oqý-ádistemelik keshender alý úshin jergilikti búdjetten 520 mıllıon teńge bólingenin habarlaǵan edi. 

---