InfoHub Logo

Astanada balabaqsha kitaptaryna degen suranys kúrt artyp, ata-analar sergeldeńge tústi.

Kitap satatyn dúkenderde uzyn-sonar kezek qalyptasyp, turǵyndar áleýmettik jelide shý kóterdi.

Ata-analardyń aıtýynsha, bir balaǵa shamamen 10-15 kitaptan satyp alý kerek, onyń jalpy quny 12 myń teńgeden asyp jyǵylady.

«Eki balam bar, bireýi 3-te, ekinshisi 4-te. Balabaqshada kitap tizimin bergennen soń, satyp aldyq. Árqaısysyna 12 myńnan astam teńge ketti, eki balaǵa 25 myń teńge», - deıdi QazAqparat tilshisine bergen suhbatynda eki balanyń ákesi R.Núsipbek.

«Eki balam da memlekettik balabaqshaǵa barady. Oqýlyqtardyń tizimin berdi. Jalpy 25 myńǵa taıaý qarajat ketti», - deıdi Aınur esimdi ana. Ol da Almaty kitap dúkeniniń aldynda kezek kóp bolǵan soń, Astananyń Ortalyq bazarynan kitap satyp alǵan.

«Barlyǵy mektep oqýlyqtary týraly máseleni kóteredi, biraq balabaqsha kitaptary týraly ún joq. Bizge 15 kitaptiń tizimin berdi. Olardyń ishinde 2-eýi áli baspadan shyqpapty. Búgin 6 dana kitap aldym, shamamen 7500 teńge jumsadyq. Kitap dúken sórelerinde bitip qalǵan», - deıdi Feısbýk qoldanýshylarynyń biri Saıa Hasen.

Eger jaǵdaı osylaı kelesi jyly qaıtalanatyn bolsa, balany mektepke berýge týra keledi dep qaljyńdaıdy ol.

«Neshe jastan alady kelesi jyly mektepke? Bizge qazan aıynda 5 jas tolady. Biz sol baqytty jandardyń qatarynda bola alamyz ba?» - deıdi S.Hasen. - Nege balabaqsha ádistemeshilerine túsinikteme jumystaryn júrgizbeıdi, olarǵa nege túsindirmeıdi? Eshkim eshteńe bilmeıdi. Jańa oqý jylynda bul ne qylǵan daıyndyq?»

Feısbýk paıdalanýshylarynyń biri Madına Káribaeva dúken aldynda jınalǵan jurttyń sonshalyqty ábigerge túskendigin jazyp, atalǵan jaǵdaıdyń neden paıda bolǵanyn tappaı dal.

«Almatykitap» aldy tolǵan nópir adam, birin-biri basyp jatyr, kezek kóshege deıin sozylyp jatyr. Bir-birlep kirgizedi. Onda keıbir oqýlyqtar joq, qolda bar kitaptardyń tizimin syrtta ilip qoıdy. Ortalyq bazarda da osyndaı jaǵdaı. Barlyq kitapty tappaısyń. Bala sany men kitap tırajdaryn durys eseptemegen shyǵar. Biz mektep aldy bilim berý ortalyǵynda oqımyz, 10 kitap alý kerek, 6 oqýlyqty satyp aldyq, 10500 teńge boldy», - deıdi M.Káribaeva.

«Balabaqsha ata-analary meni túsinetin shyǵar. «Almatykitap» dúkenderiniń biri. Keńes zamanyna qaıtip oraldym, kezekte sońyna deıin turý kerek, birneshe adamnan ǵana kirgizedi. Osyny avtomattandyryp, ınternet arqyly satyp alýdyń jolyn jasaýǵa bolmaıdy ma?!» - dep jazady Aıgúl Ámirhanova Feısbýkke dúken aldynda jınalǵan jurttyń fotosýretin salyp.

«Myna kezek KSRO kezindegi gastronomdardyń aldynda bolǵan kezekti eske salady. Oqý bastalǵanda jyl saıyn bolatyn oqıǵa, osyny júıeleýge bolmaıtyn ba edi?! Oqýlyqtardy birden bilim mekemelerine jetkizip nemese ınternet dúken ashýǵa bolmaıdy ma, "Qazposhtanyń" postmarket.kz alańy bar, balamasyn jasaýǵa da bolar edi ǵoı», - dep shaǵymdanady Feısbýk paıdalanýshylarynyń biri Qýanysh Rızanov.

---