InfoHub Logo

Qurban aıtynyń aldynda Qojanyń áıeli jubaıynyń súıip jeıtin taǵamy — tátti samsa pisiredi. Erli-zaıypty ekeýi kóńildi otyryp samsany jep, qalǵanyn tańerteń jermiz dep alyp qoıady. Biraz kór-jer áńgime aıtyp jatyp, erte turamyz dep, uıqyǵa ketedi.

Tún ortasynda Qoja áıelin búıirge túrtkilep:

— Qatyn-aý, qatyn, tur! Meniń basyma bir jaqsy oı kelip jatyr, umytyp qalam ba dep qorqamyn. Mazańdy alǵanyma renjime, bir úlken másele bar. Samsany shapshańyraq alyp kel, — deıdi.

Qojanyń munsha mazasyzdanýynyń mánisin suraýǵa da shamasy kelmeı, áıeli samsa salǵan tabaqty lezde alyp keledi. Qoja tabaqty aldyna alyp, áıelin qasyna otyrǵyzyp, tátti samsany qyzyl óńeshten ári asyra bastaıdy. Samsany jep bolǵan soń, «úh» dep bir demin alyp, Qoja áıeline bolǵan istiń mánin túsindiredi.

— Keshte birtalaı samsanyń jelinbeı qalǵanyn óziń bilesiń, — deıdi Qoja. — Basyma bir oı uıalap alsa, meniń uıyqtaı almaıtynymdy da bilesiń. Ári oılap, beri oılap: «Pisken astyń kúıigi jaman», «tańerteńgi as — táńirden» degen maqal-mátelder durys aıtylǵan-aý dep túıdim. Kel, qatyn, endi uıyqtaıyq.

---