InfoHub Logo

Qazaqstandaǵy ýnıversıtetterdiń bárinde plagıatty tekseretin júıeleri ornatyldy. Bul týraly QR Bilim jáne ǵylym mınıstri Ashat Aımaǵambetov Úkimet otyrysynda aıtty.

«Bilim berý baǵdarlamalarynyń sapasyn arttyrý úshin ýnıversıtetterge akademıalyq jáne atqarýshy derbestik berdik. Osyǵan oraı, olar bilim berý baǵdarlamalaryn daıyndaǵanda mınıstrlik bekitken úlgilik oqý josparlarynyń ornyna jumys berýshilerdiń kásiptik standarttaryn negizge alatyn boldy. Tıisinshe joǵary oqý oryndary bilim berý baǵdarlamalaryn óz betinshe ázirleýge kóship, 9 371 baǵdarlama ázirlendi», — dedi Ashat Aımaǵambetov.

Mınıstr tórtinshi ındýstrıalyq revolúsıanyń áserinen álemdik eńbek naryǵynda «daǵdylardyń tez eskirýi» qalypty jaǵdaıǵa aınalǵanyn eske saldy.

«Ómir boıy bir dıplom» senarıi endi mańyzdy emes. Sondyqtan Prezıdenttiń tapsyrmasy boıynsha Ómir boıy oqý tujyrymdamasy ázirlendi. Bul jumystyń arqasynda ýnıversıtetter formaldy emes jáne ınformaldy bilim alýdyń nátıjelerin tanyp, qabyldaıtyn bolady», — dedi vedomstvo basshysy.

Onyń málimeti boıynsha, eldegi joǵary oqý oryndaryna akademıalyq adaldyq talaptaryn saqtaý mindeti júktelip otyr. Vedomstvo plagıat problemasymen osylaısha kúrespekshi.

«Endi akademıalyq adaldyq qaǵıdattaryn buzǵan stýdentterdi oqýdan shyǵarýǵa múmkindik bar. Barlyq dıplomdyq jumystardy, jazbasha jumystardy jónsiz kóshirip alýdy bolǵyzbaý úshin mindetti túrde tekserý normasy engizildi jáne ýnıversıtterdiń bárinde osy tekserý júıeleri ornatyldy», — dedi mınıstr.

---