InfoHub Logo

Jaqynda Túrkistan oblystyq qoǵamdyq damý basqarmasynyń  "Jastar resýrstyq ortalyǵy"  jáne "Sattar Erýbaev atyndaǵy shyǵarmashyl jastardy qoldaý qorynyń"  bastamasymen "Naýryz aıy týǵanda" onlaın kórkem sóz oqý baıqaýy jeńimpazdarynyń marapattaý rásimi ótti.

Atalmysh baıqaýǵa jalpy sany 16 aýdan, qaladan 50 jas qatysty. Eki kezeńnen turatyn baıqaýdyń aqtyq kezeńine 15 qatysýshy iriktelip alyndy. Alǵashqy kezeńde qatysýshylar salt-dástúr, ulttyq ıgilikter taqyryby aıasynda 1 mınýttyq vıdeosyn arnaıy heshtegter arqyly óz paraqshasyna júktedi. Úzdik dep tanylǵan 15 qatysýshy ekinshi kezeńge ótti. Bul kezeńde qatysýshylar Táýelsizdiktiń 30 jyldyq mereıtoıyna oraı táýelsizdik, azattyq taqyryby aıasynda jyrlardy jatqa oqyp, baıqaý uıymdastyrýshylarynyń kórsetilgen nómirine joldap, 5-15 sáýir aralyǵynda  @turkistan_jastary jáne @sattar_erubaev_fund paraqshalarynda óz vıdeolaryna laık jınaý arqyly básekege tústi. 

Baıqaýǵa Qoja Ahmet Iasaýı atyndaǵy Halyqaralyq qazaq-túrik ýnıversıtetiniń oqytýshysy, fılologıa ǵylymdarynyń kandıdaty, ádebıettanýshy Ádemaý Tolysbaeva atalmysh oqý ornynyń dosenti, ustaz Gúljamal Tólegenqyzy, Túrkistan oblystyq "Jastar resýrstyq ortalyǵy"  basshysynyń orynbasary, aıtysker aqyn Dáýren Aqsaqalov,  Túrkistan qalalyq "Óner mektebiniń"  dırektory, aıtysker aqyn Turar Tileýlıev pen birneshe respýblıkalyq jyr baıqaýlarynyń júldegeri, aqyn Rysgúl Dosjanova qatysýshylardyń ónerin saralap, ádil qazylyq etti. Marapattaý keshiniń erekshe tusy-sharanyń dóńgelek ústel formatynda ótýi. Qatysýshylar men kórermender bir-biriniń ónerin, qabiletin baǵalaı  otyryp ártúrli kózqarastardy ortaǵa saldy. 

Baıqaý qorytyndysy boıynsha júldeli birinshi oryndy Tóle bı aýdanynyń namysyn qorǵaǵan  Abylaıhan Aıdaruly enshilese, kúmis taqty Saryaǵash  aýdanynan qatysqan Altynaı Baýyrjanqyzy ıelendi. Júldeli úshinshi oryn Saıram aýdanynyń úkili úmitin aqtaǵan Gúlnaz Bahýtovaǵa buıyrdy. Sondaı-aq ózge de qatysýshylarǵa ortalyq atynan Táýelsizdiktiń 30 jyldyǵyna arnalǵan kúrtesheler men alǵys hattar tabys etildi.

Qatysýshylardy jeńisimen shyn júrekten  quttyqtaımyz! Ádebıet álemimen sýsyndap ósken jastardyń arqasynda qazaq poezıasynyń gúldeneri anyq! 

 Altynaı BAÝYRJANQYZY

"Ulan" respýblıkalyq gazetiniń tilshisi
 

---