InfoHub Logo

Úkimettiń búgingi otyrysynda QR Premer-Mınıstri Baqytjan Saǵyntaev quziretti memlekettik organdarǵa muǵalimderdiń jalaqysyn kóterýdi tapsyrdy.

"2018 jyldyń 1 qańtarynan bastap bilim berýdiń jańartylǵan mazmunyna kóshken 1-shi, 2-shi, 5-shi jáne 7-shi synyp ustazdarynyń laýazymdyq jalaqysyn 30 prosentke kóbeıtý kerek. Al 1 qyrkúıekten bastap atalǵan sharalar 3-shi, 6-shi jáne 8-shi synyptar boıynsha atqarylýy shart", - dedi B.Saǵyntaev.

Úkimet basshysynyń aıtýynsha, aǵymdaǵy jylda ulttyq biliktilik testi engiziledi. Sonyń aıasynda muǵalimderdiń kategorıalary anyqtalady. Jańa júıe boıynsha óz kategorıasyn rastaǵan ustazdardyń jalaqysy 30 prosentten 50 prosentke deıin ósedi. Atalǵan jumysqa QR Bilim jáne ǵylym mınıstrligi, QR Eńbek jáne áleýmettik damý mınıstrligi, QR Ulttyq ekonomıka mınıstrligi men QR Qarjy mınıstrligi jaýapty.

Aıta keteıik, bıylǵy Joldaýda QR Prezıdenti Nursultan Nazarbaev muǵalimderdiń jalaqysyn kóterýdi tapsyrdy. "Jańartylǵan mazmun degenimiz - halyqaralyq standarttarǵa saı keletin jáne Nazarbaev zıatkerlik mektepterinde beıimdelýden ótken zamanaýı oqý baǵdarlamalary. Bular bizdiń balalarymyzǵa qajetti fýnksıonaldyq saýattylyq pen synı turǵydan oılaý qabiletin darytady.

Sonymen qatar 2018 jyly kategorıalar arasyndaǵy alshaqtyqty arttyryp, muǵalimder úshin biliktilik deńgeıin eskeretin kategorıalardyń jańa kestesin engizýdi tapsyramyn. Kategorıalardy búkil álemde qoldanylyp júrgen ulttyq biliktilik test arqyly berý kerek. Bul pedagogtardy ózderin udaıy jetildirýge yntalandyratyn bolady. Nátıjesinde, muǵalimderdiń jalaqysy biliktiliginiń rastalýyna baılanysty tutastaı alǵanda 30 prosentten 50 prosentke deıin ósedi. Bul úshin bıyl qosymsha 67 mıllıard teńge bólý qajet", - delingen Joldaýda.

---