InfoHub Logo

QR Bilim jáne ǵylym vıse-mınıstri Mıras Dáýlenov mınıstrlikke qarasty joǵary oqý oryndarynda profesor-oqytýshylar quramynyń jalaqysy qanshaǵa artqanyn aıtyp berdi.

«Mınıstrdiń tapsyrmasymen QR Bilim jáne ǵylym mınıstrligine vedimistik baǵynyshty JOO profesorlarynyń, dosentteriniń jáne oqytýshylarynyń jalaqysyn arttyrý boıynsha úlken jumys júrgizildi. Qazir joǵary oqý oryndarynyń akademıalyq derbestikke ıe ekenin jaqsy túsinemiz. Sonymen birge, Bilim mınıstrligi atalǵan JOO-lardyń jalǵyz aksıoneri retinde olardyń qarjylyq saıasatynyń baǵyttaryn anyqtaı alady. Sondyqtan da jalaqyny kóterý týraly másele qoıylyp otyr. 2019 jyly ulttyq joǵary oqý oryndarynda da, memlekettik joǵary oqý oryndarynda da jalaqy ósken. Al 2020 jyly Memleket basshysynyń tapsyrmasymen memlekettik tapsyrys qunynyń ósýine baılanysty profesor-oqytýshylar quramynyń jalaqysy ósti», – dedi Mıras Dáýlenov mınıstrlik apparatynyń jınalysynda.

Profesorlar boıynsha ulttyq joǵary oqý oryndarynda jalaqy 29%-ǵa, memlekettik joǵary oqý oryndarynda – 19%-ǵa ósti. Dosentter boıynsha ulttyq JOO-larda jalaqy 31%-ǵa, memlekettik JOO-larda – 11%-ǵa artty. Ǵylymı dárejesi joq oqytýshylar boıynsha – ulttyq JOO-larda 32%-ǵa jáne memlekettik JOO-larda 18%-ǵa ósken.

Onyń aıtýynsha, eki jyl ishindegi jalaqy kólemi QR Bilim jáne ǵylym mınıstrligine qarasty JOO-larda profesor-oqytýshylar quramynyń eńbekaqysynyń aıtarlyqtaı óskenin kórsetedi. Bul jumys ári qaraı da jalǵasady.

«Biz oqytýshylardyń halyqaralyq damýyna birtindep kóshýimiz kerek jáne olardyń ǵylymı zertteýler júrgizý qajettigin eskerýimiz kerek. Bul JOO-lardaǵy ǵylymdy damytý úshin óte mańyzdy. Ekinshi mańyzdy másele – búgin tanystyrylyp otyrǵan jalaqy mólsheri. Olardyń naqty ósýi búginde sol profesordyń, dosenttiń nemese oqytýshynyń tolyq stavkasyna baılanysty bolady. Sonymen birge, profesor, oqytýshy jáne dosent stavkasynyń mólsheri JOO-ǵa baılanysty ózgerýi múmkin ekenine nazar aýdarǵym keldi. Osyǵan baılanysty bizdiń JOO-larda biryńǵaı tásilder ázirleý qajet. Tájirıbeli mamandardy yntalandyrý úshin oqytýshylar jalaqysyn esh dárejesiz kóterý kerek jáne dárejesi bar nemese joq mamandar arasyndaǵy alshaqtyqty azaıtý qajet», – dedi vıse-mınıstr.

---