InfoHub Logo

12-14 ǵasyrlardaǵy Italıadaǵy roman gotıka arhıtektýrasynyń eskertkishi. Pıza munarasy Pıza qalasynda ornalasqan. Munara dúnıe júzine “qulaǵaly turǵan munara” ataǵymen belgili. Munaranyń qulaı bastaýy 1173-74 jyldary arh. Bonnannyń alǵashqy úsh qabatyn salǵan kezinen bastaldy. 1275 jyly arh. Djovannı dı Sımonı qurylys jumystaryn qaıta jańǵyrtyp, besinshi qabatqa deıin kóterdi. 1350 jyly arh. Tomazo dı Andrea munara qurylysyn aıaqtap, qola shatyrmen japty. Osylaısha Pıza munarasy segiz buryshty, 11 m bıiktiktegi negiz ústine ornatylǵan balkondary bar, 6 qabattan turatyn qońyraýly munaraǵa aınaldy. Birinshi qabaty tutas qabyrǵalardan turady. Al ústińgi alty qabaty arkada ádisimen, kolonnalarmen áshekeılengen. 1964 jyldan bastap búgingi kúnge deıin munarany qısaıǵan qalpynda qulatpaı ustap turýǵa baǵyttalǵan is-sharalar atqarylýda.

Munaranyń eń alasa núktesiniń bıiktigi jer betinen 55,86 m bolsa eń bıik núktesi — 56,7 m. Tabanynyń eni 4,09 m al tóbesiniki — 2,48 m. Massasy 14453 t. Qazirgi kólbeýligi 5°, (4,9 m-ge jýyq vertıkal baǵyttan aýytqyǵan). Munarada 294 baspaldaq bar.

1964 jyly 27-aqpanda Italıa úkimeti Pıza munarasyn saqtap qalýǵa baǵyttalǵan eń jaqsy jobaǵa konkýrs jarıalady. Pıza munarasynyń ushar basy kúnnen-kúnge óz negizinen ajyrap barady. Sarapshylar kishkene jer silkinisi nátıjesinde ortaǵasyrlyq irgetas opyrylyp túsúi múmkin dep qorqýda. Pızanyń eń basty mádenı eskertkishin saqtap qalýǵa baǵyttalǵan jobalar jan-jaqtan kelip tústi. Tek 1999 jyly ǵana ınjenerlik jumystar oıdaǵydaı júrgizile bastady.