InfoHub Logo

Jetisýdiń áıgili batyrlary Ótegen, Raıymbek Qarashpen tustas eken. Ótegen batyr jeruıyqty izdep, japandy aralap eline oralǵannan keıin Dýlat Qarash, Ótegen, Alban Raıymbek, Jalaıyr Qaban — tórt batyr Ótegenniń úıinde bas qosady. Raıymbek, Ótegen — qurdas, Qarashtyń jasy olardan kishi eken, báriniń úlkeni Qaban kórinedi.

Raıymbek sóz bastaıdy:

— Ótegen, el aralaǵan synshy degen, jer dúnıeni aralap keldiń, jasymyz bolsa keldi, batyrsyń, ári kópti kórdiń, ólgen kúnde jáıimiz ne bolady, qaısymyz qaıda qalamyz, sony aıtshy, — depti.

Ótegen:

— «Aǵa turyp sóılegen iniden bez» degen, dúnıeniń jaryǵyn buryn kórgen aldymyzdaǵy aǵamyz Qaban aıtsyn, — dep sózdiń kezegi Qabanǵa burypty.

Sonda Qaban:

— Ekeýiń birińdi-biriń túrtkilep, aqyry meni sóılettińder me, tyńdańdar, aıtyp kóreıin, — dep sóz bastapty. — Obalym atymdy Qaban qoıǵan áke-shesheme bolsyn, atym Qaban bolǵandyqtan, bir bastaýdyń basynda, shoq qamystyń túbinde bolamyn. Úsh kún denem jerde jatady, úsh kúnnen soń tabylmaıdy. Al, Ótegen, seniń jaıly, jyly mineziń bar edi, jyljyp aqqan sýdyń jaǵasynda qalasyń, biraq túbinde jyljısyń. Raıymbek, sen kópshil eń, qıamet qaıymǵa deıin basyńnan dabyr ketpeıtin úlken joldyń boıynda qalasyń, — depti-mis.

---