InfoHub Logo

Astana qalasyna jolymnyń túskeni bıyl ǵana. Qazaqstan Respýblıkasynyń Ulttyq medısınalyq ǵylymı ortalyǵyna oblystyq densaýlyq saqtaý basqarmasynyń kvotasymen baratyn bolǵandaǵy qýanysh sheksiz edi.

Kepten júrek syrqatymen aýyratyn maǵan degen bul kómektiń qaıtarymy joq dese de bolǵandaı. Ortalyqtyń kardıologıa bólimi dárigerleri jyly qarsy alyp, medısınanyń sońǵy jetistiktermen jabdyqtalǵan apparatqa túsirip quzyrymyzdy anyqtap berdi...

Meniń aıtpaǵym, árıne bul emes. Negizgi aıtaıyn degenim Táýelsiz Elimizdiń jańa astanasynyń kún saıyn sáýletine sáýlet, kórkine kórik qosyp kele jatqanyn óz kózimmen kórip, tamashalaǵanym edi. Meni aeroporttan qarsy alǵan ózi arhıtektor, qulsarylyq aqyn inim Taýbaı Saqtaǵanulyna aıtqyssańyz álemde bundaı qalany sońǵy 20-30 jylda eshqandaı memleket turǵyza almaıdy. Bul tek Qazaqstannyń Prezıdenti Nursultan Nazarbaevtyń ǵana qolynan kelgen ǵajaıyp keremet. Sáýlet tarıhynda dál Astanadaı kosmostyq jyldamdyqpen qysqa merzimde dúnıege kelgen qala joq eken.

«Taksı ustalyq» degenimde Taýbaı inim meni óziniń asyp-tógilip jatatyn aqkóńilimen taǵy tań qaldyrdy: «Joq, aǵa, avtobýspen baramyz. Qaıda barsańyz da Astanada tek avtobýsqa minińiz. Ekskýrsıa bolady. Áıtpese alasa, terezeleri qarańǵylanǵan jeńil mashınalardan qalanyń sán-saltanatyn tamashalaı almaısyz», — degeni. Dál solaı boldy. Astanaǵa qonys aýdarǵanyna onsha kóp bolmasa da qaladaǵy bitkeni bar, bitpegeni bar alyp ǵımarattardy qoısha órgizdi. Arasynda óziniń «Nur-Astana» atty óleńinen birer shýmaq qosyp qoıyp «bul óleńniń áni de bar, ózim shyǵarǵan», — dep qoıady. Aqkóńil aqyn Atyraý dalasynyń azynap soǵatyn aq espe jelindeı sózderimen boıdaǵy syrqatty da jazyp jibergendeı. Bitken iske degen adal peıilimen ǵana qýana qaraıtyn adamdardyń bári de Taýbaı inimdeı bolsa ǵoı, shirkin! Qalaǵa degen ásem áser maǵan da óleń joldaryn týǵyzǵan. Ol mynaý edi, qadirmendi oqyrman:

Jap-jas qala — Astana,
Úlgi-ónege basqaǵa.
Qalaýyn tapsa qar janyp,
Gúl ósedi eken tasqa da.
Taǵdyryna synaǵan,
Moıymaıdy shyn Adam.
Qaısar minez tanytyp,
Bas sáýletshi Nur-Aǵań.
Tamsandyryp halyqty,
(Janyp tur-aý, janyp tur).
«Myń bir tún» de aıtylar,
Jaýhar shahar salypty.
Keń tynysty alaby —
Dańqy asyp dalanyń.
Árlendirgen lala gúl,
Nur sáýletti qala bul.
Keler shalqyp kósilgim:
Jaǵasyna Esildiń.
Astanany kóshirý,
Kóregendik sheshim bul.

2009 jyl.

---