InfoHub Logo

Adamgershilikke júgine otyryp, neni bolsa da oń istesem, ol jan-tánimdi qanattandyrady. Demek, rýhanı qundylyqtardy boıǵa sińirý maqsatynda qabyldaǵan durys sheshimderimdi - ómirlik ustanymym dep bilemin. "Bolmasań da, uqsap baq" degendeı, talpynsam, sharq ursam, osy maqsat-muratyma jetemin degen úmit oty sáýle beredi. Jeti sany qasıetti, kıeli ekeni málim. Soǵan oraı, meniń de jeti ustanymym dittegen maqsatyma jetelep, jetildirip, jetkizedi degen zor úmitpen qalandy.

Tarqatyp aıtar bolsam, áýelgi ustanymym - densaýlyq. Táńirdiń bergen amanatyna qıanat jasamaý. Densaýlyǵyń saı bolsa, kóńiliń de jaı bolary anyq. Densaýlyq ta - ǵumyr sıaqty, adamǵa bir-aq ret buıyratyn tabıǵat tartýy. Endeshe densaýlyqtyń qadirin jastan bilý - azamattyq boryshym dep bilemin!

Ekinshi ustanymym - bilim. Bilim - janǵan shyraq! Shyraǵymyz esh sónbesin! Býynym qatpaı bilim alsam, odan asqan baılyq joq. Sebebi, "jas kezde alynǵan bilim - tasqa oıylǵan naqyshpen teń!" 

Úshinshi ustanymym - ar - uıat (abyroı). Árıne, uıatty bilý árkimge de tek paıda keltiredi. Uıattyń tolyq bolǵany jaqsy, sebebi, uıat únemi jaqsylyqqa bastap júredi. Sol úshin de, eshqashan, esh jerde, esh nárseden uıat bolmaýyn qadaǵalaǵan jón.

Tórtinshi ustanymym - ózime, ózgege, ómirge degen syılastyq. Bul - eń qymbat mıras. Ómirde ókinip qalmaý úshin, kóńiliń pák bolý úshin syılasyp ótkenge ne jetsin!

Besinshi ustanymym - aqıqat (shyndyq). Aqıqat qashan da ózin - ózi aqtap alady. Aqıqat jolynda azap shekseń de, ol úlken - abyroı. Kúnderdiń kúninde saltanat qurary haq!

Altynshy ustanymym - " Sen de bir kirpish dúnıege, ketigin tap ta bar qalan" dep, uly Abaı nusqaǵandaı, men de ón boıyma rýhanı azyq alyp, qoǵamnyń ketigine jol tabatyn kirpishi bolyp, qalansam deımin!

Jetinshi ustanymym - Uly Abaıdyń bes asylyn kókeıime uıalatý. "Talap, eńbek, tereń oı, qanaǵat, raqym oılap qoı". Taýdaı talaptanyp, eren eńbek etip, tereń oı túıip, qanaǵat qylyp, raqymdy bola bilsek, nur ústine nur bolyp, babamyz aıtqandaı, birden-bir kemeldengen jan bolar edik! Osyndaı aqynnyń aqyl-keńesteri aqylyma sep. Bul qundylyqtarmen ómirim tolyqqandy bolady.

Osylaısha, qysqa sózge qyrýar oıymdy syıǵyza otyryp, osynaý biliktilikterden baıandy baqyt nyshanyn baıqaǵandaımyn. Búgingi shegelep aıtqan syrly sózderim - erteńgi bolashaǵymnyń altyn kópiri ispettes! Bárimiz úshin de ónegeli ómir súrýdiń ózi úlken erlik, asqan mártebe!

Ómirlik ustanymym, 

Dóp soqqan ustalyǵym.

Qabyldap durys sheshim

Qabyl bol! Nusqa, uǵym.

 

Alýa İrgebaı

---