InfoHub Logo

Bir kúni Azamat pen Bolat ekeýi asyr salyp oınap júr edi, taý jaqtan pyryldap ushyp kele jatqan tikushaq kórindi. Olar alaqaılap, tikushaq qonatyn jerge qaraı júgire jóneldi.

Aspan satysymen abaılap túsip kele jatqandaı, tikushaq tómen syrǵyp, saýysqandaı saq qona qaldy. Jurt birtindep esiginen shyǵa bastady. Eń sońynan Azamattyń Almatyda oqıtyn aǵasy Arman kórindi. Azamat pen Bolat Armannyń aldynan shyǵyp, úlken kisilershe qol berip amandasty. Biraz júrgen soń Azamat shydamady bilem:

— Aǵa, chemodanyńyzda ne bar? — dep surady.

Bolattyń oıy osy chemodanda edi, ashsa eken dep keledi.

— Bul chemodannyń ishinde sender kórmegen kóp nárse bar, úıge barǵan soń berem, — dedi aǵasy.

Biraq myna ekeýi úıge jetkenshe shydaıtyn emes.

— Aǵa, qazir-aq kóreıikshi, — dep Azamat qyńqyldap bolmady.

Arman inileriniń kóńilin qımaı, sary chemodanyn ashty da, Azamatqa ózi appaq, ózi jep-jeńil, ári jup-jumsaq bir qyzyq nárse berdi.

Azamat mundaı zatty buryn kórmegen edi.

— Bul ne, aǵa? — dep surady.

— Myna býyp qoıǵan jibin sheshseń, ne ekenin kóresiń, — dedi aǵasy. Azamat álgi kip-kishkene zattyń jibin tarqatyp alyp edi, qushaq jetpes úp-úlken jastyq boldy da qaldy.

— Iá, jastyq, — dep quptady Arman. Azamat áli ań-tań bop, ańqıyp tur. Jastyq degenge senbeı Bolatqa berdi. Ol bul ekeýiniń qylyǵyna máz bolyp chemodannan taǵy bir qattap-qattap qoıǵan zatty aldy da:

— Al, balalar, mynaý qaıyq, — dedi. Buǵan ekeýiniń senetin túrleri joq.

— Qaıyq sondaı bola ma eken? — dep ekeýi mazaqtaı kúldi.

— Mundaı da qaıyq bolady, balalar. Bul qaıyqtyn eń ádemisi — sýdan óterde minip alyp, sýdan ótken soń búktep-búktep alyp qaltaǵa salyp alýǵa bolady. Senbeseńder qarap turyńdar, — álgi zatty bir tútiginen úrlep-úrlep jiberip edi, bultıyp baryp, kádimgi qaıyq boldy da qaldy.

— Oı, keremet-aı! — dedi Azamat. Bolat ta tańǵalyp, ne derin bilmeı tur.
Arman ekeýine osyndaı eki qaıyq berdi de:

— Endi Aqtolqyn ózeninen op-ońaı ótesińder. Qaıyqqa jastyqtaryńdy qoıyp, jambastap jatasyńdar da, qandaı ózen bolmasyn júzip óte shyǵasyńdar.

Azamat pen Bolat aǵasynyń ákelgen bazarlyǵyna da, qyzyqty áńgimesine de rıza edi.

---