InfoHub Logo

Qanysh Imantaıuly Sátbaev(1899- 1964) — jerimizdiń qoınaýyndaǵy qazynany kóptep taýyp, el ıgiligine jaratýǵa dáneker bolǵan uly geolog-barlaýshy, geologıa-mıneralogıa ǵylymdarynyń doktory, profesor, akademık. Ol burynǵy Semeı gýbernıasy Pavlodar ýezindegi (qazirgi Pavlodar oblysynyń Baıanaýyl aýdany) Aq kelin bolysynda dúnıege kelgen. Áýeli aýylda bastaýysh bilim alyp, odan keıin Semeı qalasyndaǵy muǵalimder daıyndaıtyn semınarıada oqıdy. Sodan soń Tomsk tehnologıa ınstıtýtyn bitiredi. Instıtýtty aıaqtaǵannan keıingi on bes jylyn Jezqazǵannyń Ulytaý aýdanyndaǵy ken baılyǵyn ashýǵa jumsaıdy. Q. Sátbaev Qazaqstanda Ǵylym akademıasyn qurýǵa, oǵan mamandar daıarlap, tehnıkalyq bazasyn nyǵaıtýǵa úlken eńbek sińirgen. 1946 jyly ashylǵan Qazaq Ǵylym akademıasynyń tuńǵysh prezıdenti bolyp saılanǵan.

Ol — Qazaqstan geologıa mektebiniń negizin salýshy, sondaı-aq 100-ge jýyq ǵylymı eńbekterdiń avtory. Onyń eńbekteriniń ishinde tarıh pen ádebıetke qatystylary da bar.

Qanysh jastaıynan tilge sheshen, qazaqtyń eski tarıhyn, óleń-jyrlaryn jaqsy biletin ákesiniń sharapatty ónegesin alyp ósken.
Óziniń jarqyn da shabytty eńbekke toly ǵumyryn súıikti eline arnaǵan. Anglıada 1946 jyly Ýınston Cherchılldiń qabyldaýynda bolǵanda: «Qazaqtar naq sizdeı alyp tulǵaly ári boıshań jaralǵan ba?» degen suraqqa: «O, joq, Cherchıll myrza, halqym menen áldeqaıda bıik!» dep jaýap berý qazaqtyń Qanyshtaı danalaryna tán ulylyq.

---