InfoHub Logo

Qaraǵandy oblysynda «Dıplommen aýylǵa!» attanǵan jastarǵa kótermeaqy esebinde 16 mıllıonǵa jýyq teńge tólendi, dep óńir basshylyǵynyń baspasóz qyzmetine habarlaıdy.

«95 jas maman «Dıplommen aýylǵa!» jobasy aıasynda kóterme aqy aldy. Ótken jyly bul baǵytqa 15 mıllıon 88 myń teńge bólingen bolatyn. 

2017 jyly jobaǵa qatysqan 39 jas mamanǵa baspana satyp alý úshin 131 mıllıon 673 myń teńge bólindi. Bıylǵy jyly bul maqsatqa qansha qarajat bólinetini ázirge belgisiz. Kóterme aqy men baspana satyp alýǵa arnalǵa qarajat baǵdarlamaǵa qatysýǵa nıet bildirýshilerden sáıkesinshe ótinim túsken soń respýblıkalyq búdjetten bólinedi», - delingen ákimdik saıtynda. 

Jastar saıasaty máseleleri boıynsha basqarma basshysy Mıras Quttybaıdyń aıtýynsha,  qala jastary arasynda aýylda eńbek etemin deýshilerdiń qarasy az.

«Negizinen oqý bitirgen soń aýylǵa baratyn jastar - ol aýyldan oqýǵa kelgen jas azamattar. Olar úshin atalmysh baǵdarlama - aýylǵa oralýǵa, jumys tabýǵa, kótermeaqy alyp, óz baspanasyna qol jetkizýge múmkindik bolyp tabylady. Qalalyq jastardyń arasynda bul baǵdarlamaǵa qatysamyn deýshiler kemde-kem», - dedi ol.

Ol sonymen qatar aýyldyq jerlerde kóbinese túrli baǵyttaǵy dárigerler men oqytýshylar, onyń ishinde aǵylshyn pániniń muǵalimderi tapshy ekenin atap ótti. «Dıplommen aýylǵa!» baǵdarlamasyna bilim, áleýmettik qamsyzdandyrý, densaýlyq saqtaý, veterınarıa, mádenıet jáne sport, agroónerkásip kesheniniń mamandary da qatysa alady.

Aýyldyq jerlerde jumysty JOO túlekteri ózderi tańdaıdy, sonan soń baǵdarlamaǵa qatysý týraly sheshim qabyldaıtyn aýdandyq komısıaǵa qujattaryn tapsyrady. Eger kandıdatýrany quptaıtyn bolsa, qatysýshyǵa 70 aılyq kórsetkish kóleminde (2018 jylǵa bul soma 168 350 teńgeni quraıdy) kótermeaqy berip, baspana salýǵa nemese satyp alýǵa 15 jylǵa deıingi merzimge 0,01% jyldyq syıaqy mólsherlemesimen 1500 aılyq kórsetkish kóleminde (2018 jyly 3 607 500 teńge) nesıe beriledi.

---