InfoHub Logo

Qaryndash jasalý barysynda 83 texnologıalyq operasıadan ótedi, ony daıyndaý úshin 107 túrli shıkizat pen materıal qoldanylady, al jalpy óndiris sıkly 11 kúndi quraıdy. Qaryndashtyń ózi qarapaıym bolǵanymen, ony óndirý muqıat josparlaý men baqylaýdy qajet etetin asa kúrdeli proses bolyp tabylady.

Qaryndashty óndirý úshin fabrıkaǵa arnaıy óńdelgen jáne býyp-túıilgen jóke aǵashynyń taqtaıshalary ákelinedi. Biraq, iske qospas buryn qaryndashtyń jazatyn ózegin daıyndaý qajet. 

Jalpy, ózekter saz balshyq pen grafıttiń qospasynan daıyndalady. Qajet qospany daıyndaý úshin qaryndashtyń ózegi jasalatyn sexta túrli texnologıalar, belgili bir maqsatta, kezek-kezegimen qoldanylady. 

- Eń alǵashqy texnologıalyq qurylǵyda saz balshyq úgitiledi. Úgitilgen balshyq konveıermen kelesi óndiris ýchaskesine ótedi.

- Ol jerde arnaıy dıirmender ornatylǵan. Olardyń kómegimen balshyq odan ári usaqtalyp, sýmen aralastyrylady.

- Endi balshyq pen grafıttiń qospasyn ázirleıtin qurylǵylardyń kezegi, munda bolashaq ózekke qajetti qospa túrli aralaspa/qospaqtardan tazartylyp, odan arǵy óńdeýge jiberiledi. Aıta ketetin jaıt, grıfelderdi (ıaǵnı, qaryndash ózekterin) daıyndaýda tek tabıǵı zattar paıdalanylady, sondyqtan óndiristi ekologıalyq taza dep esepteýge bolady.

- Qospany tyǵyzdaý qurylǵysy. Óndiristiń bul ýchaskesinde jete daıyndalǵan jáne aralastyrylǵan massa (qospa) arnaıy tesikteri bar shtamp arqyly qysyp shyǵarylady. Osylaısha, ózekterdiń ózi alynady. Alaıda, olar qaryndash ishine salyný úshin áli de birneshe texnologıalyq operasıa júrgizilý qajet.

- Jazatyn ózekterdiń daıyndamalaryn arnaıy ydysqa salyp, shkafta 16 saǵat ishinde keptiredi.

- Sodan keıin ózekterdi qolmen muqıat irikteıdi.

- İrikteýden keıin ózekter arnaıy shkafta qatty qyzdyrýdan ótedi (800-1200 gradýs Selsıa). Tańdalǵan temperatýra ózektiń qattylyq qasıetine tikeleı áser etedi.

- Qyzdyrýdan keıin ózekterge erekshe qysym men temperatýra áserimen maı toltyrylady. Bul ózekterge belgili bir jazbalyq qasıetterdi berý úshin jasalady: syzý qarqyny (ıntensıvtiligi), syrǵý jeńildigi, ushtalý sapasy, óshirgishpen óshirilý jeńildigi. Qattylyqtyń qajetti dárejesin alý úshin túrli maılar qoldanylýy múmkin: salomas, kondıterlik maı nemese tipti bal balaýyzy, pálma aǵashynyń balaýyzy.

- Osydan keıin ózekter qurastyrý ýchaskesine kelip túsedi. Bul jerde arnaıy stanoktarda qaryndashqa qajetti taqtaıshalar daıyndalady. Taqtaıshalarda ózekti ornalastyrýǵa qajetti jyrashyqtar kesiledi.

- Basqa stanokta ózekter aldyn ala daıyndalǵan taqtaıshalar ústine qoıylady.

- Endi taqtaıshalardyń jarty bólikteri jelimen jabystyrylyp, kebý úshin qysym astynda qaldyrylady.

- Keptirilgen daıyndamalar arnaıy frezalarmen (kesetin aspaptarmen) jeke qaryndashtarǵa kesiledi. Qaryndashtar óńdeýdiń birneshe sıklynan ótip baryp, birte-birte kesiledi.

Osylaısha, boıalmaǵan, biraq daıyn qaryndashtar alynady.

Ári bul satyda qaryndashtyń pishini de belgili bolady (kesýshi frezanyń tıpine baılanysty).

- Ary qaraı qaryndashtar boıalýǵa jiberiledi. Boıaý úshin zaýyttyń ózinde daıyndalǵan emaldar qoldanylady.

Bul emaldar adam úshin qaýipsiz komponentterden jasalady

- Boıaý satysynan keıin qaryndashtardy partıalarǵa jikteıdi.

- Ary qaraı arnaıy stanokta qorytyndy mexanıkalyq operasıa júrgiziledi. Ol - qaryndashtardyń shetjaqtaryn óńdeý operasıasy.

- Árleý/óńdeý texnologıalyq bóliminde arnaıy shtamptyń kómegimen árbir qaryndashty markalaý/tańbalaý júzege asyrylady.

- Qajet bolsa, qaryndashtardy arnaıy stanokpen ushtaıdy.

- Eń sońynda, qaryndashtar qolmen irikteledi jáne býyp-túıiledi.

---