InfoHub Logo

Qýdaı appaq, dýdyraǵan qalyń shash aǵaryp ketken, kúni boıy temeki soraptaıdy.

Qulqynsáriden oıanady, tura salyp temeki tartpasa, jyndy adam sekildi, ymǵa da, dymǵa da túsinbeıdi.

Adamǵa da, qudaıǵa da qajeti joq, mynaý jaryq dúnıege de, uryk-sharqyna da, juraǵatqa da jat (áıteýir áke dep, ata dep aldaı salysqan bolady), uzamaı bir kúni ún-túnsiz óle salatyn shyǵar, mynaý meshannyń otbasynan, mynaý túkpirdegi mylqaý qalashyqtan máńgilik joǵalar, sonda ǵumyr boıy temeki tútinine qaqalyp onyń ne úshin, kim úshin ómir súrgenin bireýden surap kór, bilip kór.

Degenmen onyń da oz orny bar edi:

— Ata, tamaqqa kelińiz. Kespe sýyp barady.

— Já, ishe berińder, mensiz-aq ishe berińder... men keıin... qalǵan-qutqanǵa da razymyn...

Al shyndyǵynda, sol tamaqty shydamsyzdana kútip otyrǵan — qulqynsáriden.

— Ata, eń bolmasa dambalyńyzdy aýystyryp kımeısiz be, sizde ishkıim degen qatpar-qatpar jatqan joq pa!

— Munyńa da rahmet! Qatpar-qatpar keısiń be? Shyraǵym-aý, mende jyrtyq shulǵaý da qalǵan joq qoı! Bolsa ony nesine aıap otyr deısiń! Kelin shyraq, maǵan endi túktiń de qajeti joq. Shúkir, az ómir súrgem joq, qanaǵat kerek, qudaıdan endigi bar tilegim — tezirek ólsem deımin...

Al onyń sarańdyǵynda shek joq, dirildep-qalshyldap jıǵan tergenin ańdyp júr, jaryq dúnıeni qımaıdy, júzge jetsem dep kókseıdi.

Ne úshin?

Ony ózi de bilmeıdi.

"Jattyń jany — jumbaq" desedi. Joq, óz janyń odan da jumbaq.

1930.

---