InfoHub Logo

Úsh ańshy kól jaǵasynan qus atýǵa shyǵady. Olarǵa esh nárse kezdese qoımaıdy. Ábden sharshap, keshke taman aýyldaryna qaıtyp bara jatqanda, aldarynan bir shúregeı úırek «pyr-r-r» etip usha jóneledi. Úsh ańshy atyp-atyp jibergende, úırek kól jaǵalaýyndaǵy shalshyqqa qulap túsedi. Úırekti shalshyqtan alyp shyǵyp, úsheýi keńes qurady.

— Úsheýimizdiń atqanymyz bir shúregeı, bul qaısymyzǵa jetedi?

— Jasy úlken deseńder, maǵan berińder.

— Joq, men alamyn, — deıdi ortanshysy.

— Bireýimiz alyp, qalǵan ekeýimizdiń qur alaqan qalǵanymyz bolmas, — deıdi eń kishisi, — biz búgin osy kól jaǵasyna qonaıyq. Qaısysymyz jaqsy tús kórsek, sonymyz jeıik, — deıdi. Buǵan qalǵan ekeýi «maqul» desedi.

Sonymen ańshylar uıyqtap, dem alady. Tańerteń oryndarynan turyp, kimniń qandaı tús kórgenin bir-birinen suraı bastaıdy.

Úsh ańshynyń eń úlkeni:

— Men túsimde han bolyp el bıleppin. Jurttyń bárin bir shybyqpen aıdap, ámir júrgizippin. San myń áskerim bolypty. Talaı jaýmen aıqasyppyn. Jeńiske jetip, bir záýlim saraıda toı jasap, bir keremet sulýlarmen saýyq-saıran salyp júrmin, — deı bergende, ortanshysy:

— O, ǵajap dúnıe-aı, túsimde maǵan qanat bitip, kókke ushyppyn. Peıishtiń dál ortasynda hor qyzyna úılenip, perishtelermen mıdaı aralasyp júr ekenmin-aý deımin.

Sonda kishisi bylaı depti:

— Men túsimde bireýińniń han bolǵanyńdy, ekinshińniń qanat bitip, aspanǵa ushyp, perishtelermen aralasyp júrgenińdi kórdim de, sol rahat dúnıeni tastap, myna kishkentaı shúregeı úırektiń etine bola qaıtyp kelmes dedim de, pisken úırekti ózim jep qoıdym, — depti. Sonda qalǵan ekeýi kishisiniń betine qarap, qur tamsanypty da qalypty.

---