InfoHub Logo

Burynǵy ótkende Amanjol degen aǵamyz boldy. Qus basy, at basy, tazy ustaıtyn edi. Ózi kedeı boldy. Sol áńgimesin aıtqanda ishek-silesi qatyp kúlip otyrady. Sodan estigenimdi aıtaıyn.

Ol kisi úıinen shyǵady. Itelgini alyp, qarshyǵa alyp ańǵa shyǵady. Itelgi qoıan alady. Sol qoıan alǵanda, on adam bolsyn, jeti adam bolsyn bárine bir-bir qoıan berip, jetse alady, jetpese qaıtyp keledi. Júkeń solaı bolyp júrdi.

Bir kúni bir búrkit ustady. Sol búrkitti: «apyrmaı, talaı búrkitti ustap em, mynadaı búrkit kórgen joqpyn. 8-9 kúnde zorǵa aldym, ıliktirdim». Ol búrkitti uıyqtatpaıdy eken túrtip, semásy kezekpen sol 9 kúnde ıliktirdi. Sodan qusqa salyp júrdi, qoıanǵa salyp, qasqyr soǵýǵa bir ortańǵy tyrnaǵy joq, sholaq eken. Bolmasa qasqyr alady dep maqtap otyrýshy edi.

Sol bir kúni bir ýákil qyzdy alyp kele jatqanymda qus búrkit zýlap kelip, meniń aldyma jerge qondy. Qonyp, birden aldy ǵoı dep men de umtyldym. Ar jaǵynan Júkeń de shaýyp keldi. Men búrkitke qorqyp barmadym. Júkeń kelip, attan túsip baryp, búrkit eki aıaǵymen basyp bir aq tıindi alǵan eken.

Sonda Júkeń jylap jibere jazdady:

— Bul aq tıinge túsken men qus kórgen joq em, bul jaryqtyq aq tıinnen aldy-aý, — dep sóıledi.

Sonyń aldynda qus salyp júrgende búrkitinen aırylyp qalypty. Manaǵy shyryldap, eshteńe kórmegen be, bul kisi kórgen be shyrqyrap qanatymen shapalaqtaǵan kezde shiderini qoıa beripti. Aıdap ushyp ketip otyrypty. Onyń ne qýyp ketkenin bilmeıdi bul kisi. «Artynan shapqylaı berdim, shaqyrdym, burylmady. Sonan aırylyp, úıge keldim». Sonan úıge kelip, áıeline aıtypty: «Oıbaı, qatyn, aıryldym». Sodan manaǵy keıip jatady, jatsa tús kóredi.

— Qusym qaıtyp keldi, — dep tańerteń, — Qudaıy ber, — dep áıeline qudaıy bergizip, sodan dalaǵa shyǵyp, qusty qamaıdy.

Sodan týysy Ybyraı keledi.

— Aý, Amanjol, neǵyp tursyń?

— Oıbaı, keshe qusymnan aırylyp qaldym, sony kele me dep qarap turmyn.

— Oıbaı, Júke, aqyl joq eken sende. Ketken qus kele me eken? Mal emes, adam emes, — degesin, soǵan taǵy ýaıymdap tura berdi.

— Tús kezinde qusym kele jatyr eken. Kórdim de, «meniń qusym ǵoı» dep, shaqyryp, baıaǵy aıqaılap em, joq, maǵan burylmady. Aýyldy aınalyp júrip ketti. «Apyrmaı, kelmeı kete me» dep em, joq sóıte-sóıte oralyp, ıyǵyma kelip qondy. Sonda «bul osy adamǵa shabady-aý» dep oıladym da, sıpap, búrkitti jerge túsirip, sol búrkitim solaı boldy, — dep Amanjol aǵamyz bizdiń bala kezimizde osy áńgimesin jıi aıtyp otyrýshy edi. Bul — qazirgi 88 jastaǵy qart Faızolla Ospanovtyń óziniń kózi kórgeni. Kónekóz Faızolla qarıa bizge budan basqa atasy Tileýli batyr erligi týraly, óziniń jas kezinen biletin ertegisin qyzyqtyra áńgimelep berdi.

---