InfoHub Logo

Bir joly Tóleý, Ýáıis, Nysanbaı aqyndar saparlas júrip, bir úıge qonaq bolady. Úı ıesi bar bolsa da, sarań eken. Qonaqtardy kóńilsiz qarsy alyp, nıetimen jón surapty da, úsheýiniń kóńilderin kójemen aýlap, ózderi qyzyl ińirden jatyp, qonaqtaryna tósek salyp qoıǵan eken.

Úsh aqyn jatarda syrtqa shyqqanda kórshi úıde qonaqtar bar ekenin baıqaıdy. Ol úıdiń qazandyǵynda qyzyl ot laýlap janyp, toqtynyń jas eti bylqyldap pisip jatady. Bul jaıdy kóńilderine túıgen úsheýi úıge enedi. Kıimderin sheship, shamdy óshirip, jatýǵa yńǵaılanǵanda, baıqasa, kórshi úıdiń qazandyǵyndaǵy ottyń jaryǵy esiktiń sańylaýlarynan ózderi jatqan úıdiń ishine túsip tur eken.

Bul jaı úsh aqynnyń kóńilderin alańdatyp, oılaryna túrtki, shabyttaryna qozǵaý salady. Bylqyldap pisip jatqan et esine túsip, úı ıesiniń sarańdyǵyna kúıingen Nysanbaı:

— Nysanbaı ózim atys ákem qoıǵan, — dep óleńdetkende,

Ýáıis;

— Bul nesi basyn bastap, sońyn qoıǵan, — dep onyń sózin ilip áketedi. Eki aqynnyń sózderin Tóleý qaǵyp áketip:

— Qaınasa bizdiń sor da qaınap jatqan, Mynaý úı qonaǵyna toqty soıǵan, — dep óleńdete aıaqtapty. Qonaqtarynyń biriniń sózin biri ilip-qaǵyp óleńdetkenine qulaq túrip jatqan úı ıesi bulardyń beker adamdar emestigine kózi jetip, jatyp qalǵan tóseginen turyp, úsh aqynnan keshirim surap, tún ishinde qoı soıyp, qazan asqan eken.

---