InfoHub Logo

Pavlodar qalasynyń týmasy, baǵdarlama jasaýshy Álibek Datbaev Booking.com kompanıasynyń bas keńsesine jumysqa ornalasty. Qonaqúılerden oryn brondaýǵa arnalǵan álemdegi eń iri saıttardyń biri Álibekti úsh ret suhbattasýdan keıin jumysqa qabyldaǵan. Álibek áıgili kompanıaǵa jumysqa ornalasý úshin qandaı qıyndyqtarǵa tap bolǵanyn Tengrinews.kz tilshisine aıtyp berdi. 

Álibek Datbaev 2015 jyldyń qarashasynda tehqyzmetkerlerge arnalǵan álemdik saıysqa qatysady. "Booking.com kompanıasy Hackerrank.com arqyly saıys uıymdastyrdy. Saıys kezinde túrli deńgeıdegi tapsyrmalardy sheshý úshin belgili ýaqyt beriledi. Sharaǵa álem boıynsha 500 adam qatysty. Tapsyrmalardy sátti oryndap shyqtym, úsh kúnnen keıin maǵan Booking.com kompanıasynan hat keldi, olar meni Skype arqyly suhbattasýǵa shaqyrdy. Maǵan tórt tapsyrmadan turatyn úı jumysyn oryndaýǵa 75 mınýt ýaqyt berildi. Ol tapsyrmalardy da sátti oryndadym. Keıin maǵan Amsterdamdaǵy Booking.com keńsesine shaqyrtý kelip tústi", - dedi Álibek.

Programmıstke kompanıa ushý bıletin, tamaqtaný jáne turatyn jerdiń qunyn tólep bergen. Sońǵy suhbattasýdan keıin Álibekke kompanıa jumys usynypty. Alǵashqy aıda Álibekke kompanıa turatyn jeriniń aqshasyn tólep bergen. Budan keıin ol páteraqyny óz qaltasynan tóleıdi. Datbaev qansha jalaqy alatynyn aıtpasa da, bul jerde AQSH-taǵydan eki ese kem tólenetinin jetkizdi. Aıta keteıik, jas programmıst shamamen eki jyl boıy AQSH-ta jumys istedi. 2015 jyldyń jazynda ol Qazaqstanǵa oralyp, Booking.com kompanıasy jumysqa shaqyrǵanǵa deıin Almatyda turady. Onyń aıtýynsha, qazir kompanıa áıeline de jumys izdep jatyr. Sonymen qatar, goland tilin úıretetin tegin úıirmelerge qatystyrady eken.

"Maǵan Amsterdam unady. Munda alǵash ret kelýim. Bul jerde arnaıy jumys kestesi joq. Basshylyq jumysqa qaı ýaqytta kelip, qashan ketkenińdi ańdymaıdy. Saǵan berilgen tapsyrmany belgilengen ýaqytta oryndap shyqsań bolǵany. Booking.com kompanıasynda álem boıynsha 800-ge jýyq programmıst jumys isteıdi. Aıtpaqshy, maǵan munda basqa da qazaqstandyqtardyń qyzmet etetinin aıtty. Degenmen men olarmen tanysyp úlgermedim", - dedi Datbaev.

Álibek Datbaev - Pavlodar qalasynyń týmasy. Ol Almatydaǵy QBTÝ-di bitirgen. Jaqynda ol 28 jasqa tolady.