InfoHub Logo

Qytaı stýdentteriniń kópshiligi qazaq tilin úırengisi keledi. Bul týraly búgin «Uly Jibek jolynda birge» baıqaýynyń jeńimpazdaryn marapattaý aıasynda BAQ ókilderine suhbat bergen Qytaıdyń Qazaqstandaǵy Tótenshe jáne ókiletti elshisi Chjan Hanhýeı málim etti.

«Men qazaq tilin úırengim keledi. biraq, til meńgerýde qabiletim tómen bolyp tur. Qazaq tilin úırenýdi áli bastaǵan joqpyn. Biraq aldaǵy ýaqytta qolǵa alatyn bolamyn», - dedi BAQ ókilderiniń saýalyna oraı.

Qytaı elshisi orys tilin uzaq ýaqyt oqýdyń arqasynda meńgergendigin basa aıtty.

«Qazaq tili Qytaıdyń joǵary oqý oryndarynda oqytylady. Biz qazirdiń ózinde ondaı mindetti joǵary bilim berý salasyna qostyq. Qytaıda Qazaqstandy zerdeleýmen aınalysatyn birqatar ortalyqtar bar ári qazaq tilin úırengisi keletinderdiń de legi qalyń. Shanhaıda jáne basqa da qalalarda bar. Qytaıǵa joldaryńyz túsip jatsa baryp, óz kózderińizben de kóre alasyzdar. Onda qazaq tiline qyzyǵýshylyq tanytatyn stýdentter óte kóp. Bizdiń qarym-qatynasymyzdyń turaqtylyǵy úshin bul qajet. Menińshe, qytaı tarapyna, bizge qazaq tili mamandary óte kóp kerek», - dedi Hanhýeı.

 

---