InfoHub Logo

Oqýshyny urǵan ustaz bas bostandyǵynan aırylýy múmkin. Almaty oblysynda 20 jyldan artyq eńbek ótili bar hımıa pániniń muǵalimi shákirtin jelkeleımin dep isti bolyp jatyr dep habarlaıdy KTK arnasy.

7-shi synyp oqýshysymen bolǵan áreketti basqa balalar uıaly telefonǵa túsirip, ǵalamtorǵa taratyp jibergen eken. Osydan keıin uldyń ata-anasy is qozǵaýdy talap etip, polısıaǵa aryz túsirgen.

İstiń neden bastalǵany taspaǵa túspeı qalsa da, ashýly ustazdyń oqýshyny shapalaqpen uryp jatqany anyq kórinedi. Keıin jetkinshekke daýys kóterip, julqylaýǵa kirisken. Sóıtse ol, İle aýdany Baıserke aýylyndaǵy mektepte hımıa pániniń muǵalimi eken.

Oqıǵa jańa jyl aldynda 7-shi synypta bolypty. Sabaq ústinde muǵalim oqýshylardy jalǵyz qaldyryp ketken. Sol kezde jetkinshekter bir-birin renjitip, artynsha qyz mektepte isteıtin anasyna shaǵymdaǵan.

"Mamasy synypqa kirip kelip balany urǵan. Bul habardy men ata-anasynan estidim. 24-i kúni tıisti shara qoldandym. Mámedalıeva Mıra – urǵan hımıa pániniń muǵalimi statámen jumystan bosatyldy. Onyń túsindirýi boıynsha, ol ana retinde barypty ol jerge. Iaǵnı qyzynyń jylap kelgeni úshin. Qyzynyń jaǵynan uryp jibergen ǵoı bala", - deıdi mektep dırektory Ǵabıdolla Nurmuhanbetov.

Muǵalimniń 20 jyldan artyq eńbek ótili bar eken. Biraq, balaǵa qol kótergeni úshin oǵan qaramadyq deıdi dırektor. Ustaz endi tipti qylmystyq jazaǵa tartylýy múmkin.

"2003 jylǵy ulynyń mektepte muǵalimniń qol kótergendigine aryzdanady. Aryz İle aýdandyq ishki ister basqarmasyna tirkelip, Qylmystyq kodekstiń 107-babyna sáıkes is qozǵaldy. Qazirgi tańda sotqa deıingi tergeý jumystary júrgizilýde", - deıdi Almaty oblystyq İİD resmı ókili Aıman Myrzekova.

Ǵalamtorda qyzý talqylanyp jatqan osy oqıǵa boıynsha oqýshylardy qaraýsyz qaldyrǵan synyp jetekshisi de qatań sógis alypty.

Hımıa pániniń muǵalimi endi zań boıynsha berisi aıyppul tólep qutylady, arysy 2 jylǵa deıin bas bostandyǵynan aıyrylýy múmkin. Al tártip saqshylary onyń jazasyn jeńildetetin nemese aýyrlatatyn jaǵdaılardy eskeretin bolady.

---