InfoHub Logo

QR Bilim jáne ǵylym mınıstri Ashat Aımaǵambetov orta bilim berýde Qazaqstannyń 5 salystyrmaly zertteýlerge qatysatynyn aıtty.

Olardyń negizgileri - PISA (Programme for International Student Assessment), TIMSS (Trends in International Mathematics and Science Study), PIRLS (Progress in International Reading Literacy Study) zertteýleri.

«PIRLS zertteýinde biz mátindi túsiný jáne oqý saýattylyǵy boıynsha 27-oryndamyz. TIMSS-ta matematıka jáne jaratylystaný pánderi boıynsha akademıalyq bilimde úzdikter ishindemiz jáne 10 jetekshi eldiń qataryna kirdik», — dedi bilim jáne ǵylym mınıstri.

Oqýshylardy alǵan bilimderin qoldanýǵa úıretý úshin 2016 jyldan bastap mektepterde synı oılaý men daǵdylardy damytýǵa baǵyttalǵan jańartylǵan mazmun engizilýde.

Jahandyq básekege qabilettilik ındeksinde Mınıstrlikke 8 ındıkator bekitilgen. Reıtıńke 140 el qatysady.

«Olardyń ishinde «kásiptik-tehnıkalyq bilim berý sapasy» boıynsha 2017 jylmen salystyrǵanda 11 pozısıaǵa (102-den 92-orynǵa), «oqytýdaǵy synı oılaý» boıynsha 1 pozısıaǵa (46-dan 45-shi orynǵa) jaqsardy. «Kútiletin bilim berý uzaqtyǵy» (53 oryn) jáne «jarıalanymdardyń dáıeksózdiligi» (110 oryn) boıynsha aldyńǵy kórsetkishter saqtaldy», — dedi A.Aımaǵambetov.

Munda «bilim berýdiń ortasha uzaqtyǵy» (1 pozısıaǵa 39-dan 40-orynǵa), «bastaýysh synyptardaǵy oqýshylar men muǵalimderdiń araqatynasy» (23 pozısıaǵa, 50-den 73-orynǵa), «túlekterdiń daǵdylary» (7 pozısıaǵa, 86-dan 93-orynǵa) jáne «zertteý ınstıtýttarynyń sapasy» (1 pozısıaǵa, 83-ten 84-orynǵa) boıynsha pozısıalardyń tómendeýi baıqalady.

Joǵary bilim berýdegi negizgi reıtıńter - QS World University Rankings jáne Times Higher Education.

Mınıstrdiń aıtýynsha, QS-de Qazaqstanda oń dınamıka bar, 2011 jyly reıtıńte 5 joǵary oqý orny, 2019 jyly - 10 ýnıversıtet atap ótildi. Reıtıńte qazaqstandyq joǵary oqý oryndary arasynda kóshbasshy oryndy ál-Farabı atyndaǵy QazUÝ ıelendi - 207 oryn (top-300). Úzdik 500 qataryna 2 ýnıversıtet kirdi: L. Gýmılev atyndaǵy EUÝ (418), M. Áýezov atyndaǵy OQMÝ (491).

Soynmen qatar, 2018 jyly alǵash ret Times Higher Education reıtıńtik basylymymen 2 qazaqstandyq JOO (ál-Farabı atyndaǵy QazUÝ, Gýmılev atyndaǵy EUÝ) tanyldy.

Jalpy alǵanda, bilim jáne ǵylym mınıstri sendirgendeı, bilim men ǵylymnyń sapasyn, qoljetimdiligin jaqsartý boıynsha Qazaqstannyń halyqaralyq reıtıńterdegi ustanymdaryn arttyrý jónindegi jumys Bilim men ǵylymdy damytýdyń memlekettik baǵdarlamasy jáne basqa da júıeli sharalar sheńberinde jalǵasatyn bolady.

---