InfoHub Logo

Elimizde 1-synypqa oqýshylardy qabyldaý merzimi aıaqtaldy.

Qujattardy qabyldaý tolyq tórt aı, ıaǵnı 1 sáýirden 1 tamyzǵa deıingi aralyqta júrgizilgen bolatyn.

«Osy merzim ishinde qazaqstandyqtardan 377 681 ótinish kelip túsken. Onyń ishinde 339 880 oqýshy birinshi synypqa qabyldandy. Ótinish berishýlerdiń 70,7% mektepti memlekettik tilde oqýǵa nıet bildirdi. Qujattardy qabyldaý egov.kz elektrondy portaly jáne jergilikti atqarýshy organdardyń aqparattyq júıeleri arqyly júzege asyryldy», - dep jazylǵan mınıstrlik habarlamasynda.

Sondaı-aq, birinshi synypqa qabyldanýshylardyń eń joǵary kórsetkishi Shymkent qalasynda (99,3%), Pavlodar (97,6%), Shyǵys-Qazaqstan (96,6%) oblystarynda tirkelgen.

Buǵan deıin Oqý-aǵartý mınıstri Ǵanı Beısembaev 1-synypqa qujattardy qabyldaý nelikten 1 tamyzǵa deıin júretinin túsindirgen edi.

«Qujattar qabyldaýdy biz erterek, kóktemnen bastaımyz. Oqýshylardyń sanyn anyqtap, oqýlyq daıyndaýdy aldyn ala josparlaý kerek. Qujat qabyldaýdy 1 qyrkúıekke deıin uzartýǵa da bolar edi. Onda 1-synyp oqýshylaryna qansha kitap kerektigi belgisiz bolady. Oqýlyqtardy erterek qajetti kólemde satyp alý qajet. Ýaqyttyń tyǵyzdyǵynan 1 tamyzǵa deıin ǵana qujat qabyldaý júredi», - dedi Ǵanı Beısembaev Úkimet otyrysynan keıin tilshilerdiń suraǵyna.

---