InfoHub Logo

Qazaqstanda «Úzdik ǵylymı qyzmetker» ataǵymen qosa, 2 myń AEK kóleminde yntalandyrý syıaqysy beriledi.

Aıta ketsek, ǵylym jónindegi tıisti zań jobasy Parlament Senatynyń birinshi otyrysynda maquldanǵan bolatyn. «Zań jobasynda birneshe jańalyq qaralǵan. Solardyń ishindegi eń mańyzdysynyń biri – úzdik ǵalymdarǵa «Úzdik ǵylymı qyzmetker» ataǵymen 2 myń AEK kóleminde olardy yntalandyrý kózdelip otyr.

Zań jobasyna qoldaý kórsetken Úkimetke alǵys aıtamyz. Atalǵan syıaqynyń kólemi 5 mln 834 myń teńgeni quraıdy. Bul degenimiz ǵylym salasyna jastardyń qyzyǵýshylyǵyn arttyryp, ol saladaǵy izdeniste júrgen ǵylymı qyzmetkerlerdiń básekelestigin arttyrary sózsiz. Zań jobasyna sáıkes, syıaqyny berý erejesin júzege asyrý – ýákiletti organǵa júktelgen», - dedi búgingi Senat otyrysynda depýtat Álimjan Qurtaev.

Al Bilim jáne ǵylym vıse-mınıstri Sholpan Qarınova syıaqyny berý máselesine toqtaldy.

««Úzdik ǵylymı qyzmetker» - ǵylymı ortadaǵy kópten kútken jańalyq. Bul syıaqy jylyna 50 ǵylymı qyzmetkerge berý qarastyrylǵan. Elimizde búgingi tańda 20 myńǵa jýyq ǵylymı qyzmetker jumys isteıdi. Bul syıaqy jas mamandardy yntalandyrady dep kútilýde. Búgingi kúni osy syıaqy boıynsha ǵalymdarǵa qoıylatyn naqty talaptardy aıqyndaý jumystary bastaldy. Birneshe usynys keldi. Bul rette ashyqtyqty qamtamasyz etý máselesi birinshi orynda tur. Ony aıqyndaıtyn komısıa quramyna belgili qoǵam qaıratkerleri, qoǵamdyq uıymdardyń músheleri, táýelsiz baqylaýshylar da kiredi», - dedi ol.

---