InfoHub Logo

Qazaqstanda quqyqbuzýshylyqqa beıim balalarǵa arnalǵan arnaıy mektepterdiń ataýynan «devıantty» sózi alynyp tastaldy.

«Devıantty minez-qulqy bar balalarǵa arnalǵan uıymdardyń jumysyndaǵy tıptik erejelerge birqatar ózgeris engizildi. Bul rette mynaǵan mán bere ketýlerińizdi suraımyz: zańda belgilengennen keıin («QR balalardyń quqyqtaryn qorǵaý jónindegi qyzmetterdi júzege asyratyn uıymdardyń qyzmetimen baılanysty máseleler boıynsha keıbir zańnamalyq aktilerine ózgerister men tolyqtyrýlar engizý týraly») atalǵan uıymdardan «devıantty» degen sóz alynyp tastaldy. Sebebi, bul sózdiń ózi balalar úshin tańba sekildi bolyp kelgen edi. Arnaıy mektepten shyqqannan keıin balanyń qujatynda burynǵysha «devıantty mekemeden» shyqqany týraly sóz jazylmaıtyn bolady. Iaǵnı, aldaǵy ýaqytta bala qoǵamǵa sińisip ketýin kómektesetin taǵy bir qadam jasalyp otyr», - deıdi BǴM Balalardyń quqyqtaryn qorǵaý komıteti bala quqyqtary jáne halyqaralyq yntymaqtastyq basqarmasynyń basshysy Erjan Jırenbaı elordada ótken respýblıkalyq jıynda.

Onyń aıtýynsha, bul baǵytta Jambyl oblysyndaǵy arnaıy mektep óz erejelerine ózgeris engizip, uıymnyń atynan «devıantty» sózin alyp tastaǵan. Iaǵnı, Jambyl oblysyndaǵy Devıantty minez-qulqy bar balalarǵa arnalǵan arnaıy mektep - balalar men jasóspirimderge arnalǵan arnaıy mektep-ınternat dep ózgertilgen.

Buǵan deıin Erjan Jırenbaı búgingi tańda elimizde balalarǵa arnalǵan 8 arnaıy bilim berý mekemesi bar ekendigin atap ótken bolatyn.

«Olardyń 7-i arnaıy bilim berý uıymy bolsa, 8-shisi Shyǵys Qazaqstandaǵy erekshe rejimdegi uıym. Jalpy, elimizde búgingi tańda 200-ge jýyq bala osy uıymdarda oqyp, tárbıelenip jatyr. Iaǵnı, bul quqyqbuzýshylyqqa beıim balalar», - deıdi Erjan Jırenbaı.

---