El aýzynda «pálenshe bylaı depti» degen sózder az emes. Sol tarıhı jaýaptardyń keıbirin usynamyz:

Bilip aıtqan sózge qun jetpeıdi...

Tóle bı Álibekuly

Anahars birde: «Qyzyq eken, Elladada jarysqa óńsheń jaqsy men jampoz túsedi de, tóreligin qaıdaǵy bir dármensizder beredi eken!» — dep tańdanypty.

* * * *

Qulaqtarynyń úlkendigimen tanymal bolǵan Galıleoǵa bireý bylaı dep suraq qoıypty:

— Qulaqtaryńyz adam úshin úlkendeý emes pe?

Sonda Galıleo:

— Meniń qulaqtarym adam úshin úlkendeý bolýy múmkin, biraq seniń qulaqtaryń esek úshin tym kishkentaı emes pe? dep jaýap jaýap bergen eken.

* * * *

Bir fılosoftan «Siz sáttilikke senesiz be?» dep suralǵanda fılosof: Iá, áıtpese jaqsy kórmeıtin adamdarymnyń jetistikterin qalaı túsindirer edim, — dep jaýap bergen eken.

* * * *

«Adam boıyndaǵy baq pen sorǵa birdeı sebepshi bolatyn ne?» degen suraqqa Anahars: «Til!», — dep jaýap bergen eken.

* * * *

Fransıa úkimet músheleriniń biri saýsaǵyn kartanyń ústinde júrgizip: «Eń birinshi osy jerdi jaýlap alýyńyz kerek edi, sosyn basqa jerlerdi jaýlaı beretin edińiz» dep Napoleonǵa syn aıta bastaıdy. Sonda Napoleon: «Iá, olardy saýsaqpen jaýlap ala berý múmkin bolǵanda aıtqanyńyzdaı ister edim» degen eken.

* * * *

Napoleon soǵysta Ispanıany jeńedi. Jeńilgen Ispanıanyń patshasy:

— Sender tek aqsha men mal-múlik úshin soǵysasyńdar, al biz namysymyz, abyroıymyz úshin soǵysamyz, — deıdi.

Sonda Napoleon:

— Iá, durys, adamdar ózinde nesi kem bolsa sol úshin soǵysady, degen eken.

* * * *

Sokrat ólim jazasyna kesilgende áıeli: «Ádiletsiz túrde ólim jazasyna kesilip jatsyń!» dep jylaı bastaıdy. Sokrat oǵan: «Sonda ádiletti túrde óltirilýim kerek pe edi» dep jaýap beripti.

* * * *

Sultan Alparslan 27 myń áskerlerimen Vızantıa topyraqtarynda ilgerilep kele jatqanda barlaýǵa jibergen áskerleriniń bireýi aldyna kelip, úreımen: «300 myń adamdyq dushpan áskeri bizge jaqyndap keledi.» degende Alparslan: «Biz de olarǵa jaqyndap kelemiz» degen eken.

* * * *

Bir kúni fılosof Dıogen óte tar kóshede baı, tákappar adammen kezigipti. Bireýi shetke shyǵyp jol bermeıinshe ótý múmkin bolmapty. Alaıda, mańǵaz baı fılosofqa: «Men bısharalarǵa jol bermeımin» depti. Sonda Dıogen joldyń shetine shyǵyp: «Al men jol beremin!» depti.

* * * *

Fatıh Sultan Mehmet hannan surapty:

— Stambuldy ne úshin jaýlap aldyń?

Fatıh Sultan:

— Áýeli ol meniń júregimdi jaýlap aldy, keıin men ony jaýlap aldym, — deıdi.

* * * *

Iavýz Sultan Sálim han basqa da Osman patshalary sekildi joryqqa attanatyn jerlerin qupıa ustaıdy eken. Birde joryqqa shyǵarda ýázirleriniń bireýi qaı ólkege bara jatqanyn qoıarda-qoımaı suraıdy. Iavýz Sultan oǵan: «Sen syr saqtaýdy bilesiń be?» deıdi. Ýáziri: «Álbette ámirshim, bilemin» degeninde sultan: «Men de bilemin» dep jaýap beripti.

* * * *

Bir jınalysta bir jas jigit túrik aqyny Mehmet Akıfty kemsitý úshin: «Keshirińiz, siz veterınarsyz ba?» dep suraǵanynda, Akıf esh qynjylmastan: «Iá, bir jerińiz aýyryp tur ma?» degen eken.