InfoHub Logo

Medısına salasyndaǵy bilim berý júıesin jańǵyrtý aıasynda Qazaqstandaǵy joǵarǵy oqý oryndary halyqaralyq tájirıbeni zerttep jatyr. Otandyq mamandardy qyzyqtyrǵan tájirıbeniń biri - joǵarǵy oqý oryndaryna mektep túlekterin emes, medısınalyq koleji támámdaǵan stýdentterdi qabyldaý júıesi, dep QazAqparat habarlaıdy.

«Kez kelgen salanyń damýy nemese quldyraýy kadrǵa baılanysty. Halyqaralyq tájirıbeni eskere otyryp, medısınalyq bilim berýdiń jańa modelin júzege asyrǵymyz keledi. Bul model stýdentterdi irikteýge qatysty. Sondyqtan, tańdaý jasaý kerek, mektepte bıologıa men hımıa pánderin tereńdetip oqyǵan oqýshylardy ma, álde medısınalyq kolejerde oqyǵan «daıyn» mamandardy qabyldaımyz ba?!» - dedi búgin «Jetekshi sheteldik ýnıversıtetter men medısınalyq JOO arasyndaǵy strategıalyq seriktestiktiń birinshi kezeńin qorytyndylaý týraly» halyqaralyq konferensıa aıasynda QR Densaýlyq saqtaý jáne áleýmettik damý mınıstri Tamara Dúısenova.

Jalpy, mınıstr atap ótkendeı, medısına salasyndaǵy bilimdi jetildirý úshin otandyq alty ýnıversıtet halyqaralyq alty ýnıversıtetpen strategıalyq baılanys ornatqan eken. Onyń tórteýi - AQSH ýnıversıteti bolsa, ekeýi - Eýropanyń bilim berý oryndary eken.

Konferensıa barysynda S.J. Asfendıarov atyndaǵy Qazaq ulttyq medısınalyq ýnıversıteti jáne Dúk ýnıversıteti (AQSH), Batys Qazaqstan memlekettik medısınalyq ýnıversıteti jáne K. Marsınkov atyndaǵy Poznan medısınalyq ýnıversıteti (Polsha), Ońtústik Qazaqstan memlekettik farmasevtıkalyq akademıasy jáne Gdan medısınalyq ýnıversıteti (Polsha), Qaraǵandy memlekettik medısınalyq ýnıversıteti jáne Lýnd ýnıversıteti (Shvesıa), Semeı qalasynyń memlekettik medısına ýnıversıteti jáne Sent-Lýıs ýnıversıteti (AQSH), Astana medısına ýnıversıteti jáne La Sapıensa ýnıversıtetteriniń (Italıa) strategıalyq áriptestiktiń 2016 jylǵa jumysyn qorytyndylady. 2017-2018 jyldarǵa arnalǵan JOO-nyń strategıalyq seriktestikteriniń maqsattarymen mindetteri, sonymen qatar Qazaqstandaǵy medısınalyq bilimdi reformalaýdyń negizgi kezeńderi  talqylandy.

---