InfoHub Logo

QR BǴM Ulttyq bıotehnologıa ortalyǵynyń ǵalymdary tereń jaralar men kúıikterdi emdeýge arnalǵan birneshe ınovasıalyq qural ázirledi.

QR BǴM Ulttyq bıotehnologıa ortalyǵynyń ǵalymdary tereń jaralar men kúıikterdi emdeýge arnalǵan birneshe ınovasıalyq qural ázirledi. Olardyń biri — X-Graft bıologıalyq jabyny. Ol klınıkalyq zertteýlerden ótip, kóp uzamaı Qazaqstan Respýblıkasynda tirkeledi. Zertteý nátıjeleri atalǵan bıologıalyq materıaldy qoldaný jarany emdeý prosesin edáýir tezdetetinin kórsetti. Sonymen qatar naýqastardyń aýrýhanada emdelý kezeńin qysqartady.

«Ortalyq ǵalymdary ázirlegen X-Graft jabyny zamanaýı ınjenerlik tehnologıalar kómegimen kollagen jáne elastın talshyqtarynan jasalǵan. Tańý materıaly tereń jáne uzaq ýaqyt emdelmeıtin jaralarǵa arnalǵan, sonymen qatar trofıkalyq jaralardy ýaqytsha tańý úshin qoldanylady. Jabyn qoldanysta yńǵaıly, dáke tańǵyshpen salystyrǵanda jaranyń betine jabyspaıdy. Emdik qasıetteri boıynsha atalǵan bıologıalyq jabyn sheteldik analogtardan kem túspeıdi jáne beriktigi joǵary, ıkemdi ári absorbsıaǵa ıe», — dedi QR BǴM Ulttyq bıotehnologıa ortalyǵynyń bas dırektory Erlan Ramanqulov.

Sondaı-aq Ulttyq bıotehnologıa ortalyǵynyń ǵalymdary tereń jaralar men kúıikterdi emdeýge arnalǵan «Fıbrospreı» jasýshalyq preparatyn oılap tapty. Aerozol adamnyń teri jasýshalarynyń (fıbroblasttar) sýspenzıasynan turady jáne jaranyń saýyǵý prosesin eki ese jyldamdatady. Sonymen qatar klınıkalyq tájirıbede bul preparat teri transplantasıalaryn tezdetý úshin qoldanylady.

Ortalyq ǵalymdary sonymen qatar baǵanaly jasýshalardy qoldaný arqyly kúrdeli synyqtar men zaqymdalǵan tize býyndaryn qalpyna keltirý tehnologıasyn jasady. Klınıkaǵa deıingi synaqtardyń nátıjeleri boıynsha bıokompozıtti jasýshalyq gıdrogel joǵary tıimdiligin kórsetti. Gıdrogeldiń quramyndaǵy baǵanaly jasýshalar súıek nemese shemirshek tinderiniń qalpyna kelý prosesin tezdetedi. Arnaıy tehnologıanyń arqasynda preparat operasıadan keıin úsh-alty aı ishinde zaqymdalǵan súıek pen shemirshek tinin qalpyna keltiredi.

---