InfoHub Logo

El tarıhynda alǵash ret Halyqaralyq aqparattyq tehnologıalar ýnıversıtetiniń İT komandasy jeti dúrkin álem chempıondaryn artqa tastap, halyqaralyq dárejede úzdikter qatarynan kórindi. Bul týraly QR Bilim jáne ǵylym mınıstrligi habarlaıdy.

2 jeltoqsanda Sankt-Peterbýrg, Barnaýl, Almaty, Tbılısı qalalarynda bir ýaqytta Northern Eurasia (Soltústik Evrazıa) óńirindegi stýdenttik komandalar arasynda baǵdarlamalaý boıynsha halyqaralyq olımpıadanyń qorytyndy kezeńi ótti. Fınalǵa TMD elderinen 318 komanda qatysty. Quramyna Temirlan Satylhanov, Abaı Baımuqanova, Aıbar Qýanyshbaı kirgen Halyqaralyq aqparattyq tehnologıalar ýnıversıtetiniń komandasy 13 eseptiń 8-in shyǵaryp, TMD elderi arasynda júldeli 4 oryndy, Qazaqstan boıynsha 1 oryndy ıelenip, altyn medalǵa qol jetkizdi. Endigi kezekte qazaqstandyq komanda 2019 jylǵy sáýir aıynda ótetin álemdik fınalǵa qatysady. 

«Bul - ýnıversıtetimizdiń bıylǵy eń úlken jeńisi. Biz mundaı kórsetkishke 6 jyl kóleminde qol jetkize almap edik. Endigi kezekte el tarıhynda alǵash ret álemdik chempıonatta úzdikter qatarynan kórinemiz degen úmit bar bizde. Bul joly Halyqaralyq aqparattyq tehnologıalar ýnıversıtetiniń stýdenttik IT komandasy jeti dúrkin Álem Chempıony Sankt-Peterbýrg qalasyndaǵy ulttyq zertteý aqparattyq tehnologıalar, mehanıka jáne optıka ýnıversıtetinen (ITMO) ozyp, halyqaralyq dárejede úzdikter qatarynan kórindi. Bul - óte jaqsy kórsetkish» - deıdi Halyqaralyq aqparattyq tehnologıalar ýnıversıtetiniń rektory Damır Shynybekov.

Qorytyndy jekpe-jekte 7 esepti shyǵarǵan QBTÝ komandasy da jaqsy óner kórsetip, TMD elderi boıynsha 14-oryndy ıelendi. Olar Qazaqstan boıynsha 2-orynda turaqtady. Al, 4 esepti sheshken Nazarbaev Ýnıversıtetiniń komandasy TMD elderi boıynsha 81-oryndy, Qazaqstan boıynsha 3-oryndy ıelendi. 

Jeńimpaz komandanyń kórsetkishteri TMD óńirinde sońǵy 5 jyldaǵy eń úzdik dep tanylyp otyr. JOO jeńisi - Qazaqstan úshin úlken jetistik, óıtkeni el tarıhynda bir de bir komanda Soltústik Eýrazıa óńirinde mundaı kórsetkishke qol jetkizbegen. Aıta keteıik, olımpıadalyq qozǵalys Qazaqstanda 2000 jyldary bastalǵan.  

---