Qazaqtyń eń jaqsysy,
Úsh nársege shoqynar:
Maqtany, asty, nápsisi –
Shoqynǵany osylar.

Asty bıler jas bolsa,
Maqtanar baqqa mas bolsa,
Aýlaqta aram as bolsa,
Asaýdan deme shoshynar.

Saıtanmen oınas júregi,
Paıda men maqtan tilegi,
Aramǵa batsa bilegi,
Jaqsyǵa qaıtyp qosylar?

Tilinde bal, ishinde ý,
Kóz baılaǵysh kóp jádý,
Jaqsy atanǵan óńkeı qý,
Aldap alǵan dosy bar.

Birin-biri: «Dos»,– deser,
«Jaýymnyń jolyn tos»,– deser,
Dos qolymen ot kóser,
Ózi ap-aman otyrar.

«Men de artyńnan baram»,– dep,
«Óltirse, qunyńdy alam»,– dep,
«Qutylmas menen, bálem»,– dep,
Aýzymen qoqaı-loqylar.

Aramdy sýdaı simirip,
Ernimen ýyn jymyryp,
Maskúnem, báńgi bop júrip,
Jaýyryn jaba toqynar.

Tamaq úshin jan jaldap,
Aryn satyp, eldi aldap,
Saýysqansha qylmańdap,
Ár úıden boq shoqylar.

Júregi qatyp, muz bolǵan,
Maıda tili biz bolǵan,
Qyzteke edi, qyz bolǵan,
Beıne aldamshy sopylar.

«Bar ma maǵan bir syn?» – dep,
«Ustaǵanym qaı din?» – dep,
Oılamaıdy: «Kimmin?» – dep,
Júreginde toty bar.

Qansha jaryq nur quısam,
Haqıqattan syr quısam,
Órshelener sý quısam,
Nápsi degen oty bar.

Kúndep ishi qaınaıdy,
Qyzyl tilin qaıraıdy,
Áli-aq ózi jaıraıdy,
Aldynda ádil soty bar.

Aram men aqty bir jımaq,
Júrekke qaıtyp sıdyrmaq,
Qylmaq jáne qyldyrmaq,
Qyztekeniń nıeti bar.

Ózińe kóńiliń tolsa da,
Basyńa qydyr qonsa da,
Júregiń jalǵyz bolsa da,
Astyńnyń eki k…i bar.

Ashýlanyp albastyń,
Kúndemeı meni qalmassyń,
Tilimdi kesip almassyń,
Aqty aıtýǵa erki bar.

Alysyp seni jeńbeıim,
Aldaýyńa senbeıim,
Ashshy tilmen emdeıim,
Júregińniń derti bar.

Adamdy jaýǵa bermeýge,
Jetse qoldy sermeýge,
Qyztekeni emdeýge,
Aqyldyń qylǵan serti bar.

Aıyram dep jendetten,
Tazartam dep indetten,
Qutylam dep mindetten,
Imanymnyń berki bar.

---