InfoHub Logo

Qazir bilýge qajet jańa aqparattyń kólemi jylyna 30 paıyzǵa ósip otyrady. Bul týraly búgin Respýblıkalyq jastar forýmy aıasynda jastarmen kezdesken QR Premer-Mınıstriniń orynbasary Imanǵalı Tasmaǵambetov aıtty.

Úkimet basshysynyń orynbasary jastarǵa tabysqa jetý úshin talapty bolý az, bilimdi bolý kerektigin basa aıtty.

«Búgingi ilim-bilim  bul keshegi oqýdan áldeqaıda bólek dúnıe. Bir mektep, bir ýnıversıtettiń sheńberinde emes, aǵymy qatty aqparatty zamannyń ár kúninde qajet uly qudiret. Mysaly, qazir bilýge qajet jańa aqparattyń kólemi jylyna 30 paıyzǵa ósip otyrady. Iaǵnı, siz ýnıversıtetti bitiremin degenshe, aqparattyq keńistik tolyǵymen jańalanyp ketedi. Nátıjesinde tehnologıa salasyndaǵy kún saıyn emes, saǵat saıyn bolatyn ózgeristerden bir sát kesh qalý - izbe-iz ókshelep kele jatqan básekelestikke oryn berip, artqa sheginý degen sóz», - dedi Tasmaǵambetov.

Osy rette vıse-premer bilim-ǵylym salasy memleket nazarynan esh ýaqytta tys qalmaǵanyn atap ótti. Onyń dáleli retinde elordadaǵy «Nazarbaev» Ýnıversıtetin atap, bilim ordasyn eń mańyzdy ulttyq jobalardyń biri ekendigin aıtty.

«Qazirdiń ózinde onyń oqý isin uıymdastyrýǵa álemniń eń úzdik ýnıversıtetteri at salysyp, halyqaralyq talapqa saı jańa bilim júıesin qalyptastyryp otyr. Bolashaqta elimizdiń barlyq joǵary oqý oryndary osy ozyq júıege ótetin bolady», - dedi Premer-Mınıstrdiń orynbasary.

---