InfoHub Logo

Búgin Astanada Respýblıkalyq jastar forýmynyń bilim berý salasyna arnalǵan pikirtalas alańynda Bilim jáne ǵylym vıse-mınıstri Elmıra Sýxanberdıeva rektorlar saılaýy týraly aıtyp berdi.

«Máselen, keshe Qaraǵandy qalasynda baqylaýshy keńesiniń otyrysy ótti. Osy ýaqytqa deıin bizde rektorlardyń bes saılaýy boldy. Sol kezde úmitkerlerdiń kandıdatýralaryn joǵary oqý ornynyń janyndaǵy baqylaýshy keńester qarady. Atalǵan keńes kem degende eki-úsh úmitkerdi usynýy qajet. Olardy qupıa daýys berý arqyly tańdaıdy. Sosyn barlyq qujattar respýblıkalyq komısıanyń qaraýyna jiberiledi», - deıdi E.Sýxanberdıeva.

Vıse-mınıstrdiń aıtýynsha, respýblıkalyq komısıanyń otyrystary Astanada ótip turady. Úmitker ózi basqarǵysy keletin joǵary oqý ornyn damytý baǵdarlamasyn tanystyryp, birneshe suraqqa jaýap berýi tıis. Osydan keıin Premer-Mınıstrdiń orynbasary Imanǵalı Tasmaǵambetovtyń tóraǵalyǵymen respýblıkalyq komısıa óz sheshimin shyǵarady.

«Sondyqtan osy jerde otyrǵan kez kelgen adam rektorlyq úshin talasa alady. Árıne, ol úshin ǵylymı dáreje kerek. Sosyn joǵary oqý ornyn damytýdyń strategıalyq baǵdarlamasyn durys ári kásibı túrde qorǵaı bilý kerek. Ol jerde búgingi ǵylymı-texnologıalyq jańalyqtar da kórinis tabýy shart. Biz soǵan basa nazar aýdaramyz», - deıdi E.Sýxanberdıeva.

---