InfoHub Logo

2020 jyldyń 6-9 sáýiri aralyǵynda Ál-Farabı atyndaǵy Qazaq ulttyq ýnıversıtetinde, sonyń ishinde tarıh, arheologıa jáne etnologıa fakúltetinde stýdentter men jas ǵalymdardyń dástúrli «Farabı álemi» konferensıasy bolyp ótti. Jyl saıyn turaqty túrde ótetin konferensıanyń bıylǵy jyly eki ereksheligi boldy. Birinshiden, konferensıa ál-Farabıdiń 1150 jyldyq mereıtoıy qurmetine arnaldy, sondyqtan da konferensıa aıasynda ál-Farabıdiń ǵylymı murasyn zertteý men zerdeleýge arnalǵan ár túrli taqyryptar keńinen qamtyldy. Sonymen birge, konferensıa baǵdarlamasy boıynsha ál-Farabıdiń rýhanı jáne ǵylymı murasy máselesin talqylaýǵa arnalǵan birneshe dóńgelek ústelder uıymdastyryldy. Atap aıtqanda: «Ál-Farabı jáne baqytqa jetý fılosofıasy» (moderatory: t.ǵ.k., dosent Kartabaeva E.T.), «Otyrardyń ańyzy men aqıqaty» (moderatory: t.ǵ.k.  Mýhajanova T.N.), orys toptarynda «Al-Farabı ı ego vzglády na razvıtıe obshestva ı cheloveka» (moderator: k.ı.n., dosent Mıımanbaeva F.N.), «Dýhovno-etıcheskıe normy al-Farabı v sennostnom ızmerenıı ýnıversıtetskogo obrazovanıa KazNÝ» (moderator: k.ı.n., dosent Nýrpeısova B.E.).

Bıylǵy jylǵy stýdenttik ǵylymı konferensıanyń ekinshi ereksheligi – onyń onlaın formatynda ótýi boldy. Ózderińizge belgili, álemdi koronavırýs indeti jaılap otyrǵan jaǵdaıda, 2020 jyldyń 16 naýryzynan bastap elimizde tótenshe jaǵdaı engizilgen bolatyn. Osyǵan baılanysty basqa da oqý oryndary sıaqty ál-Farabı atyndaǵy QazUÝ da qashyqtyqtan oqytý formatyna ótip, tek sabaqtar ǵana emes, barlyq basqa da  sharalar osy formatta ótkizilýde. Osy oraıda, dástúrli «Farabı álemi» stýdentter men jas ǵalymdar ǵylymı konferensıasy da onlaın-konferensıa formatynda uıymdastyryldy. Meniń jetekshiligimdegi, ejelgi dúnıe jáne orta ǵasyrlar tarıhynyń ózekti máselelerimen aınalysaty «Nıka» atty ǵylymı stýdenttik klýbtyń uıymdastyrýmen ótkizilgen «Antıka dáýiri jáne orta ǵasyrlardaǵy álem tarıhy» seksıasynyń jumysyna barlyǵy 12 stýdent qatysty. Seksıa barysynda osy kezeńniń ár túrli ózekti taqyryptary boıynsha stýdentterdiń daıyndaǵan baıandamalary tyńdaldy. Eń bir qyzý talqylaý týǵyzǵan baıandamalar: 2 kýrs stýdenti Batıhanov Beriktiń «Ál-Farabı jáne baqytqa jetý joly» (ǵylymı jetekshisi: t.ǵ.k., dosent Qartabaeva E.T.),  4 kýrs stýdenti Nabıdýlla Jandostyń  «Tomazzo Kampanellanyń áleýmettik-gýmanıstik ıdeıalary» (ǵylymı jetekshisi: t.ǵ.d., prof. Jumaǵulov Q.T.), 2 kýrs stýdenti Asqarova Botagózdiń «Ortaǵasyrlyq túrkiler tarıhyndaǵy hazarlardyń orny» (ǵylymı  jetekshisi: t.ǵ.k., dosent Qartabaeva E.T.), 2 kýrs stýdenti Davýtova Gýlınýrdyń «Otnoshenıe k detám v srednevekovoı Evrope» (ǵylymı jetekshisi t.ǵ.k., dos. Mıı̆manbaeva F.N.), 4 kýrs stýdenti Azım Arýjannyń «Eftalıtterdiń saıası tarıhy» (jetekshisi: t.ǵ.k., dosent Mýhajanova T.N.) boldy.

Seksıa májilisi aıaqtalysymen, «Nıka» stýdenttik ǵylymı klýbynyń uıymdastyrýymen «Ál-Farabı jáne baqytqa jetý fılosofıasy» atty dóńgelek ústel ótkizildi. Dóńgelek ústel barysynda negizgi spıkerler: 3 kýrs stýdenti Amanýlla Eńlik jáne 2 kýrs stýdenti Batıhanov Berik ál-Farabıdiń baqytqa jetý fılosofıasy boıynsha qysqasha baıandamalar jasady. Dóńgelek ústel barysynda stýdentter ál-Farabıdiń baqytqa jetý fılosofıasyn taldaı otyryp, ózderiniń baqyt týraly kózqarastaryn da ortaǵa saldy.

Jalpy, ál-Farabıdiń 1150 jyldyq mereıtoıyna arnalǵan «Farabı álemi» stýdentter men jas ǵalymdardyń onlaın-konferensıasy qyzý talqylaýlarmen, joǵary deńgeıde ótti. Konferensıa qorytyndysy boıynsha stýdentterdiń ǵylymı jumystary ár túrli marapattaýlarǵa usynyldy.

 Konferensıa jumysyna baılanysty jasaıtyn eń basty  qorytyndymyz – myna, álemdi jaılaǵan koronavırýs indeti jaǵdaıynda jáne sonymen baılanysty ýnıversıtetimizde jappaı engizilgen qashyqtyqtan oqytý tehnologıasy jaǵdaıynda stýdentterdiń ǵylymǵa degen qyzyǵýshylyǵynyń báseńdemegeni, kerisinshe arta túskendigine kóz jetkizdik. Bul ýnıversıtet oqytýshylaryn erekshe qýantqan jaǵdaı boldy.  Munyń ózi qazaq jastarynyń elimizdiń bolashaǵy ǵylym men tehnologıada ekendigin jaqsy túsinetindiginiń aıqyn aıǵaǵy dep bilemiz.

Ál-Farabı atyndaǵy QazUÝ

dúnıe júzi tarıhy, tarıhnama jáne derektaný

kafedrasynyń dosenti, t.ǵ.k. Qartabaeva E.T.

---