InfoHub Logo

UBT kezinde zańsyz áreket jasaǵan túlekter jyl boıy testileý tapsyrý múmkindiginen aıyrylady. Bul týraly «Birge oqý» jobasynyń arnalary arqyly ótken tikeleı efırde «Ulttyq testileý ortalyǵy» RMQK dırektorynyń orynbasary Naýjan Dıdarbekova málim etti.

«Bıyl Ulttyq biryńǵaı testileýdi ótkizý prosesine ózgerister engizilip otyr. Osy oraıda zańsyz áreketterge talaptar kúsheıtildi dep aıtsaq bolady. Mysaly, bizde buryn tyıym salynǵan zat aýdıtorıadan tabylǵan jaǵdaıda ǵana akt jasalyp, oqýshy testileýden shyǵarylatyn bolatyn. Al bıylǵy UBT-ny ótkizý qaǵıdatyna toqtalsaq, testileýde ǵımarattaǵy metaldy izdeıtin qurylǵy aımaǵyna deıin testilenýshi baladan tyıym salynatyn zat tabylǵan jaǵdaıda, onda tıisti akt jasalyp, túlek testileýge jiberilmeıdi. Bul turǵyda bıyl UBT tapsyrý múmkindiginen aıyrylady», — dep túsindirdi N. Dıdarbekova.

Sonymen qatar aýdıtorıada tyıym salynǵan zatpen ustalǵan túlektiń de testileý nátıjesi joıylyp, osy jyly UBT tapsyra almaıtyn bolady.

Budan bólek N. Dıdarbekova keıbir talapkerler óziniń ornyna basqalardy testileýge jiberip jatatynyn, bul zańsyz áreket jasaǵandarǵa tıisti jaza qarastyrylǵanyn aıtty.

«Mundaı jaǵdaı bógde adamdy óziniń ornyna kirgizýge talpynǵan túlekke de qatysty. Endi bul áreket úshin atalǵan adam jyl boıy emtıhan tapsyra almaıdy», — dedi Ulttyq testileý ortalyǵynyń ókili.

Mamannyń paıymynsha, mundaı sharalar talapkerler arasynda zańsyz áreketterdiń jolyn kesedi.

---