InfoHub Logo

6-synyptyń bir top er balasy úılerinen osy úshin surap alǵan aqshalaryna 8 naýryz merekesine baılanysty synyptas qyzdaryna syılyq satyp almaq bolyp dúkenge qaraı kele jatty. Olar dúkenge kire bergende dúken ishinde turǵan ózderiniń synyp jetekshi ustazdaryn kórip yńǵaısyzdanyp qaldy. Biraq synyp jetekshi ustazdary balalardyń ne maqsatpen júrgenin bilgennen keıin olardyń isine aralasqan joq.

Endi dúkenshiniń nazary balalarǵa aýdy. Balalar qoldaryndaǵy aqshalarynyń bárin dúkenshi táteıdiń alaqanyna saldy. Dúkenshi aqshany tez-tez sanap shyqty da, balalarǵa kúlimsireı qarap: "Syılyq neshe qyzǵa jasalý kerek?" - dep surady. Balalar synyptas qyzdarynyń sanyn aıtty. Dúkenshi táteı balalarǵa ózderi aıtqan syılyqty ásemdeı otyryp jasap berdi. Balalar syılyqtardy sómkelerine jasyrdy. "Qyzdarǵa birden kórsetip almaý kerek, - deıdi olar. - kórsetip alsa, syılyqtyń qyzyǵy qalmaıdy. Tek tapsyrar kezde bir-aq kórsetemiz".

Aqyry syılyq tapsyratyn sát te keldi-aý. Balalar kezekti pán muǵalımasynan ruqsat surap alyp, qysyla-qysyla júrip qyzdarǵa syılyqtaryn tapsyryp shyqty. Qyzdar olarǵa raqmetterin aıtty. Al synypta otyrǵan muǵalıma óziniń de shákirttik shaqtary esine túskendeı, balalardyń qylyǵyna kúlimsiregen kúıi qarap otyrdy.

Biraq oqıǵa munymen bitken joq edi. Dál sabaq aıaqtalar tusta qyzdar men er balalar áldenege shekisti de qaldy. Sol-aq eken, balalar shuǵyl sheshimge keldi:

"Syılyqtarymyzdy qaıtaryńdar!"

Qyzdar sómkelerin ashyp jiberip, syılyqtaryn qaıtaryp jatty. Balalar bárin de qaıtadan jınap aldy. Qyzdar úılerine qaıtyp ketti. Balalar syılyqtaryn qushaqtaǵan kúıi áli otyr. Kóktemniń qubylmaly kúni de uıasyna baryp qonaqtady.

"Myna syılyqtardy ne isteımiz? - deıdi balalar. - Muny aqyry qyzdar úshin aldyq qoı, endeshe, ózderine qaıtyp bereıik".

Balalar endi Jańa jyl keshindegi Aıaz Atalar qusap syılyqtaryn arqalaǵan kúıinde qyzdardyń úılerin aralap shyqty. Olarǵa syılyqtaryn qaıtadan tabystady. Qyzdar balalarǵa kúlimsirep turyp taǵy da raqmetterin aıtty. Sóıtip, er balalar bir kúnniń ishinde qyzdarǵa 8 naýryz merekesine arnap eki márte syılyq berip, olardan eki márte alǵys estidi.

---