InfoHub Logo

Men áste jalqaý emespin. Biraq keıde úlkender qaıdaǵy bir ish pystyratyn jumystardy tapsyrady da, oryndamasań jalqaý dep bostan bos kinálaıdy. Shirkin, jumystyń bári mynandaı bolsa: qar kúrep jatqanda aıaq astynan balmuzdaq jaýsa, al sý tasyǵan kezde kenetten shúmekten lımonad atqylasa. Mine, keremet dep osyny aıt! Mundaı múmkindik týsa, tań atqannan kún batqansha erinbeı jalyqpaı jumys isteýge barmyn ǵoı. Onda jer betinde jalqaý bala qalmas edi. Báriniń de támpish tanaýlary terlep-tepship, júzderi alaýlap jumys istep júrgenin kórer ediń.

Senderge qupıalap aıtaıyn. Men  qyzyǵyp isteıtin bir jumys bar. Ol — súttiń qaımaǵyn aıyratyn separator mashınasynyń ydystaryn jýý. Apam ala sıyrdy saýyp, shelek toly sútti kóterip jazǵy senekke kirgennen bastap menen degbir kete bastaıdy. Álgi sút tartatyn mashınanyń janǵa jaıly yzyńyn tyńdap, oıyndy  umytyp, sol aradan shyqpaımyn. Qaıta-qaıta anamnyń qasyna baryp: «Jumysty aıaqtap qaldyńyz ba?» — dep, mazasyn alamyn. «Sonsha taǵatyń taýsylǵany ne, sútti quıǵanym jańa ǵana emes pe? — deıdi ol kisi kúlip. — Oınap kelseıshi. Sol ýaqytta daıyn bolyp qalady». Biraq oıynǵa kete qoımaımyn. Óıtkeni ydystardy menen buryn ápkem jýyp qoıýy múmkin ǵoı. Ol bul istiń qupıasyn bir bilip alsa, «qyzyq jumystan» aıyryldym deı ber.Sondyqtan da men eshqaıda ketpeı, aýlada aınalsoqtap júremin de qoıamyn. Mundaıda ýaqyt degen ótpeıdi ǵoı. Zaryqtyryp baryp apamnyń: «Boldym», — degen daýysy estiledi.

Jalma jan mashınanyń sút júretin, ájemniń kımesheginiń sáldesi sıaqty daǵaradaı ydystaryn bólshektep tastaımyn da, ydysqa juqqan qaımaqty suq saýsaǵymmen jalaımyn kelip. Qaımaqtyń táttiligi sondaı, saýsaǵymdy qosa jutyp qoıa jazdaımyn. Ábden jalap-juqtap bolǵan kezde ydysty jýmasań da bolatyn derlikteı jarqyrap turady. Biraq soǵan qaramaı-aq sýmen bir shaıyp qoıamyn. «Meniń erketaıym sondaı eńbekqor», — dep sheshem de shyn súısinedi. Mine, kórdińiz be, men asa eńbekqor balamyn. Tek qyzyqty jumystar bolsa boldy.

---