InfoHub Logo

— Sen ótirik aıtyp tursyń, jaqsy bala sóıte me eken,— dedi inim kózime kózin qadap turyp.

Men aıtarǵa sóz tappadym.

— Sóıtýge bola ma eken? — dedi ol artynan taǵy da.

Onyń betinen qaǵyp, zekı almadym. Ózi sondaı súıkimdi, kóńilin qımadym.

Ol artynan maǵan aıaýshylyqpen úńilip, murnyn tyrjıta qarady. İle qaıta renjidi.

— Nege ótirik aıtasyń?

Keshe synyptasym Jandos «velosıpedimdi satamyn, bazarǵa birge júrshi» degen soń ileskem. Barsaq, saýda qyzyp jatypty. Zatymyzdy satyp, máz bop turǵanymyz sol edi, bes-alty balanyń sap ete túskeni.

— Mynaý bizdiń velosıped. Keshe urlap ketken. Sender alǵan ekensińder ǵoı. Qolǵa tústińder me, bálem? — dep úlkendeý bireýi meniń jaǵamnan al ketti.  Arpaq-turpaq alysa kettim.

Kóptiń aty kóp, olarǵa shamamyz kelmedi. Bir qarasam, Jandos joq. Meni tastap, taıyp turypty. Men de sytylyp shyqtym da, zyta jóneldim.

Kelgen boıda Jandosty izdedim. Sóıtsem, aıypty Jandos eken. Tura qashqany óz aldyna, velosıpedti urlaǵany da ras eken. Men kórmesteı bolyp keri buryldym.

— Ne boldy? — dep surady kóshede kezdeskender. Sodan bildim, betimde tóbelesten iz qalǵanyn.

— Qulap qaldym, — dedim jaltaryp. Ótirigime úlkender emes, bes jastaǵy inim de senbedi.

— Ótirik aıtpa deısiń, óziń aıtasyń, — dedi ol maǵan qadalyp. Men úndemeı tómen qaradym.

— Budan keıin ótirik aıtpaımyn,— dedim men sálden soń ýáde berip.

İnim senbedi.

Bette «tańba» bar eken dep sabaqtan qalýǵa bolmaıdy ǵoı. Ertesi synypqa erterek kelip, sońǵy partalardyń birine jaıǵasyp aldym. Sabaq ýaǵynda apaı baıqamaǵan shyǵar desem, ózimdi aldappyn.

— Ne boldy?— dedi qasyma kelip.

— Qulap qaldym, — dedim daıyn jaýabymdy aıtyp.

— Ótirigińe bolaıyn! — dedi synyp jetekshimiz mıyǵynan kúlip.

Ary qaraı úndemeı qoıdym. Balalardyń bul da bir qarýy. Úndemeı qoısań, suraǵyna jaýap ala almaǵan adam ózi qoıady.

Keshke úıge kelgende anam óńimnen bir kóńilsizdikti ańǵarǵan sıaqty:

— Tynyshtyq pa? — dedi.

— Tynysh! — dedim. Biraq anam maǵan senbegendeı uzaq qarady.

— Balam-aý, halqymyzda «Ótirik órge bastyrmas», «Ótiriktiń quıryǵy bir-aq tutam» degen maqal-mátelder bar. Sony esińnen shyǵarma…

Anashym qadalyp az turdy burylyp ketti. Denem ysyp kirerge tesik tappadym. Júregimniń túkpirine kirip alǵan bir yńǵaısyz sezim tynyshymdy alyp barady.

«Ózime de sol kerek. Endi ólsem de ótirik aıtpaspyn»…

---