InfoHub Logo

Jer komısarıatynyń qaı esigin ashsań da burqyraǵan qaǵaz, qym-qıǵash bir-birin qýalaı otyrǵan qyzmetkerlerdi kóresiń. Olardyń bir qıyn máselesi meniń otyrǵan adamdaı top-top bolyp kelip, álsin-álsin tartqan shylymdarynyń býaldyr kók tútinderi olardyń kóptegen isinen buryn kózge túsedi. Syrtqy esikten kirgennen-aq kezdesken esikti ashyp, mal sharýashylyq sektoryn izdep kele jatqanymyzda, oıda joq jerden qoltyǵynda nany bar, almany kúısep kele jatqan eki áıelge kezdese qaldyq.

— Pojalýıstańyz... Keshirińiz, bizge mal sharýashylyq sektory kerek edi — degenimiz-aq muń eken, uzyn muryndy, altyn tisti, qara tory qyz jep kele jatqan almasyn asyǵyńqyrap shaınap, tez-tez jep úlgermegen-aq: «Aldyńyzda, 15-úıde. Byrdındy surasańyz»-dedi. Biz raqmetpen basty ızep, 15-úıge bet qoıdyq. Altyn tisti, qara tory qyz «baryńyz» dep bas ıip, jymıyp qala berdi.

15-úıdsh esigin ashyp qalǵanynda «Sektor nachalnıgi» degen jazý týra mańdaıyna soǵady. Tór aldynda otyrǵan qara jigitten «Byrdın siz bolasyz ba?» — dep surap edi... «Ia, men, qyzmetińiz qandaı edi?»-dep qarsy saýal qoıdy.

— Qyzmet sol, biz ólkelik komsomoldar gazetinen edik. Sizben mal sharýashylyǵy azyǵyn daıarlaý, mal ósirý jumystary týraly keńeskeli keldik...

— Oı-boı, tipti, jaqsy, qosh keldińiz. Jańa ǵana birsypyra aqparlardy alyp, qorytaıyn dep otyr edim — dep arbıǵan stoldyń ústine jentek-jentek qaǵazdardy burqyratyp tastaı berdi.

---