InfoHub Logo

Qalmaq áskerimen bolǵan bir jolǵy soǵysta aılasyn asyrǵan jaý jaǵy Qýatbek pen Medetbek batyrlardy qolǵa túsirip, elderine alyp ketedi.

Qalmaq hany bul ekeýin basqa tutqyndardan bólek ustatqyzyp, erekshe kúzet qoıady. Bul eki jas batyrdyń qazaq ekenin bilgen jáne olardy kórgen hannyń qazaq áıelinen týǵan Aıperi degen qyzy Qýatbek batyrǵa ǵashyq bolyp qalady. Endigi oıy osy batyrlardy tutqynnan bosatyp, eline jetkizip, Qýatbek batyrǵa jar bolýdy ańsaıdy. Batyrlarǵa ońasha kezdesip, oıyn olarǵa ashyq aıtyp, qashyp ketý týraly kelisedi. Sóıtip, astyrtyn úsh tulpardy daıyndap, eki batyrmen birge ózi de qashýdy uıymdastyrady.

Kelisilgen ýaqytta hannyń qyzy eki tulpardy jetelep kelip, eki batyrdy mingizip, jaý tutqynynan qashyp shyǵady. «Endi qaýip-qaterden, qýǵynnan qutyldyq-aý!» — dep, İle boıyndaǵy qalyń toǵaıǵa kirip dem alady. Sodan keıin İle ózeniniń sýyna jýynyp-shaıynyp alýdy uıǵarady. Aǵaıyndy eki jigit ózenniń joǵarǵy jaǵyndaǵy sýǵa túsedi, al Aıperi qyz ózenniń tómengi aıaǵyna baryp jýynýǵa ketedi.

Eki batyr jýynyp bolyp, attardy jetelep, Aıperi sýǵa túsken jerge kelgende, onyń jolbarys jaryp ketken óli denesine tap bolady. Ony kórgen Qýatbek pen Medetbek qatty qaıǵyryp, qyzdyń denesin aq jýyp, arýlap ózenniń jaǵasyna jerleıdi. «Jatqan jeriń jaıly bolsyn, Alla aldyńnan jarylqasyn!» — dep qos batyr attaryna minip, elge qaraı bet burady. Qolda qarý, qorjynda as joq, ábden júdegen Qýatbek pen Medetbek jıyrma táýlikteı jol júrip, elge jetedi. osy kúnderi ekeýi kezdikterimen astaryna minip kele jatqan attarynyń qulaǵyn táýligine eki retten kertip, qanyn soryp qorek etken eken. Aýylǵa jetkende attarynyń qulaqtary shunaq bolǵan eken...

Oqýǵa keńes beremiz:

Jalańtós batyr

Elshibek batyr týraly

Er Jaýǵash

---