InfoHub Logo

Aı kóleńke beti shermıip úıelep jatyr. Aspan tap Alataýdyń eteginen bastalǵandaı, juldyzy qaısy, shamy qaısy aıyryp bolmaıdy. Shyqsa kirgisi joq, ketse qaırylǵysy joq, qaırylmasqa bekingende bet kóriseri jáne kem... qańyraǵan bir bólmege qańǵyryp baryp qalǵandaı bolatynyn oılap kúrsindi. Rasynda adam bolam dep kelgende kisikıikke aınaldyrǵan Almatynyń túninen basqa muń shaǵar eshimi de joq eken-aý. Ataqty aqynnyń atyndaǵy jaǵalaýǵa túsip, shetkerek shanshylǵan fonar túbinbegi arqalyqty aǵash oryndyqqa sylq etip otyra ketti. Tas tóbeden qıǵash túsken jaryqtyń pushpaǵy baqaıynyń basynda ǵana jatyr. Arǵy jaǵyndaǵy tirshilikti kózine de, kóńiline de qondyra almady. Qaptaldaǵy oryndyqta balań jigit enesiniń baýrynan emshek izdegen buzaýdaı balǵyn qyzdyń alqymyn túrtinketep otyr eken. Ash belden oraı tartyp, qulaq túbinen qytyqtaı sharpyǵan ystyq demimen tula boıdy toqsha uryp, alqyntyp áketetin batylsyz bozbalanyń ot qushaǵynda uıqy qashyp, tań bozyna deıin talyqsyp otyra beretin bula shaqtyń tanys sýreti kóz aldynan júgirip ótti. Moınyn ishine tyǵyp, eki qolyn qaltasynan almaǵan kúıi táltirekteı basqan erkektiń kúrkili selk etkizdi. Bet-aýyzy tútindep, ezýindegi temekiniń tuqylyn shaınap barady eken. Olaq pen sholaqtyń, pushyq pen pysyqtyń esebinen jańyltqan kidiligi ustap, jıyryla qaldy. Quddy etegin basyp ketkendeı. Sosyn myrs etti. «...Baqytymyz juǵysty bolsyn!» dedi-aý...

Ómirdiń ótip bara jatqanyn on eki aıda bir eske salyp qoıatyn ádeti. Jylda pálenshekeń ekeýiniń basynan attap kete almaǵan baqyttyń silekeıinen dámettirip, biri oń jaqtan óris uzarta almaǵan, biri talaq arqalap tórkinin tapqan qamkóńil qurbylarynyń kókeıin qurttatyp qoıa beretin ádeti. Basqalarǵa buıyrmaı-aq qoıǵan pálenshekeńder de tap bunyń jolynda shashylyp jatqandaı. Jylda bireýimen tabysyp, esi shyǵyp otyrǵany.

Keıde jyny keledi. Osy jasqa deıin jalǵyz júrgenin kózi túsken jigittiń kóńilin shyrmap, jetegine ererlik alqam-salqam mineziniń joqtyǵyna, úmitpen kóz tikkenge kúdipen qaıta qaraıtyn sekemshil talǵampazdyǵyna jabady. Áıtpese urǵashynyń óńdisin kórse, qalǵan dúnıeniń esebinen jańylatyn erkek baıǵustyń qaısysy sóz aıtpady. Jasy da bar edi, jasamysy da bar edi. Jamany da, jaqsysy da... bálkim. Tipti áıeli bar ekenin jasyrmaǵanmen, úıirilip kete de almaı «balany da, basqasyn da qıdym jolyńa, men sendikpin» dep esin shyǵarǵandary joq emes. Qudaıǵa shúkir, esi shyqsa da, aqyly ornynda bolatyn...

Keıde qyrt ómirdiń qıqymyndaı taǵdyryn ár jyrtyqqa bir ólsheýmen kún ozdyryp júrgen qurbysyn aıaıdy. Oıynda bar, qoınynda bar, qasynda joq pálenshekeńder, bóten áıel men jat erkektiń birin qymsynýdan, birin qysylýdan azat eter arsy-gúrsiden solyǵy basylǵan kúni, basqa qoranyń mekıenin qýyp keterin bile tura beti qaıtpaıtynyna nalıdy.

Mynaýysyn kósheden tappasa, kórmeden tappaǵan-aý dep bastabynda-aq topshylaǵan. Rasynda túngi klýbtyń kúzetshisi eken. «Otyzdan asqannyń oıranynda» eki ókpesin qolyna ustap júrip tanysqan kórinedi. Esimi Qulboldy. Lústranyń sáýlesi tóbesinde syrǵanaq teýip júrgen qazandaı sary bastyń jelkesi quj, shekesi qatpar-qatpar, keńsirigi úgitile dombyqqan, janary ashshy eken. Jigittiń minezdisin emes, sharqaıasyn kórip turǵandaı jatyrqaı bas ızesti. Jeti atasynan beri bekzattyq arylmaǵan jentlmen kisimsıtinin qaıtersiń. Suq saýsaqtyń ymqyrýynda qylqıǵan shuńǵyl qasyqpen salattyń irgesinen qopara kósip, týǵan kún ıesine jem tastap otyr. Jaqtyrmaı otyrǵanymen isi joq, buǵan da myrzalyq tanytty. Artynsha otyrǵandarǵa jaǵalaı konák quıyp, qyrly rúmkanyń birin ózi de shymshı qysyp, qýanysh ıesine qaraǵan. Qurbysy da lyp etip ornynan turdy. Bıylǵy týǵan kúnine jaratýshysy erekshe syılyq jibergenin tebirene baıandaı kelip «qyzdar, bárińe de Qulekeń ekeýimizdiń baqytymyz juǵysty bolsyn!» dep sol turǵan boıda rúmkany qotara saldy. Kóńil aýanyna qaraı kelisti-kelissiz bas qosyp, sher tarqatysar otyrystarda árkim óz muńyna búrkip-búrkip jiberetin zahar sýdy bul joly da uzaq mólıtken joq... Keńirdekte lap etken otty daýyl tómen qaraı júıtkip berdi. Sosyn mańdaıy jipsip sala bergen. Biraq basy kóńildi dyrdýmen bastalyp, aıaǵy jylap-syqtaýǵa ulasatyn, árbirden soń qaıdaǵy bir jurekti qozǵar áýendi yńyldap jatyp qalǵyp ketetin ádepki keptiń quıryǵyn shubaltýǵa bul joly kóńil shappady. Kıinip syrtqa shyqqan...

---