InfoHub Logo

Men ony Ásıanyń aıaǵynan kórdim.

Sý jańa qyzyl bylǵary báteńke kózińdi qyzyqtyryp, jalt-jult etedi.

— Apa! — dedim úıge júgirip kelip. — Ásıaǵa sheshesi qandaı báteńke satyp ápergenin kórdiń be? Túý, qandaı ádemi!

— Keshe etik satyp áperdim ǵoı. Aldyń — qys, báteńkeniń qajeti ne saǵan?

— Túý, apa, báteńkeden de aıaǵym tońbaıdy. Alyp ber maǵan…

— Qoı, odan da moınyńa oraıtyn shalma satyp ápereıin.

— Túý, shalma ne kerek sol? Men bylaı, paltomnyń jaǵasyn kóterip, mine, búıtip júre bermeımin be… Apa, báteńke…

— Endeshe, etigińdi dúkenge qaıta ótkizeıin, — dedi apam meniń sózimdi bólip, biraq jyly shyraı bildirmedi. — Qystan báteńkemen-aq shyǵatyn bolsań, etiktiń qajeti ne?

— Oh, qandaı jaqsy! Endi mende de ádemi báteńke bolady!

Qýanǵanymnan sekirip-sekirip túsip, apamnyń betinen súıip aldym.

Sol kúni keshke Ásıanykinen esh aınymaıtyn sý jańa qyzyl báteńke kıip, men de kóshege shyqtym…

Arada talaı kún ótti. Qyzyl báteńkeniń de qyzyǵy basyldy. Uzamaı… ekinshi toqsannyń alǵashqy oqý kúni bastaldy.

…Biz mektepke kelgende, qar qylamyqtap qana tur edi, úlken úziliske shyqqanda baıqadyq, japalaqtap jaýyp ketipti.

Sabaqtan úıge kún bata qaıttyq. Qar borap tur. Uıtqı ushqan ulpa qar betke sabalap, kirpikke jabysady. Kórinip turǵan úıge jetkenimshe, báteńkeniń qysqa qonyshynan quıylǵan sýyq qar aıaǵymdy qaryp ketti. Qalaı qalqalasam da bolar emes. Qoınyma jel gýlep, qar borasyny denemdi túrshiktirip jiberdi. I-shaı!

Úıge júgirip kirsem, apam ashanada júr eken.

— Nemene, tońyp qaldyń ba? — dedi dirdektep turǵan meni kórip, júzinde jumbaq kúlki bar.

Men jaýap ornyna qatty titirkenip, tońǵanymdy bildirdim.

— Qalaı, qystan qyzyl báteńkemen shyǵa alasyń ba? — Men úndegen joqpyn.

Erteńine kún birjolata sýytyp ketti. Túnde jaýǵan qar sharbaqtyń aldyn basyp qalypty. Úıilgen qarǵa laqtaı sekirip, kórshi balalarmen biraz oınadyq. Oı, kún qandaı sýyq, qaltyrap kettim!

— Qaraǵym-aý, munyń ne? —  deıdi apam syrttan kirgen maǵan renjip.

Aıaǵyma qarasam, qonyshymnan quıylǵan qar erip, sý bolǵan báteńkemniń eki urty quddy jaıynnyń basyndaı jalpıyp ketipti. Ózi baıaǵy jyltyraǵan ádemi túsinen de aıyrylyp qalǵan eken.

Keshe mektepten qaıtardaǵy qatty tońǵanym da kenet esime tústi. Búgin qar odan qalyń ǵoı, mynaýmen tipti mektepke deıin jete almaıtyn da shyǵarmyn…

Etikti dúkenge nege qaıta ótkiz dedim eken. Apamnyń kóz qarasynan da osy suraqty aıtqyzbaı uqqandaımyn.

Mektepke baratyn da kez jetti. Báteńkemniń baýyn ótkize almaı myqshyńdap jatyrmyn. İshi áli degdimepti, shylqyp tur. Ózim báteńke baýynyń birjola ótpeı qoıǵanyn tilegendeımin. Shynynda da, sondaı bir keremet bolsa she? Onda, árıne, apam, sóz joq, etikti qaıta satyp áperer edi.

Men sony oılaǵanymsha bolǵan joq, kenet qara bylǵary etik… Anada apam dúkenge qaıta ótkizbek bolǵan ózimniń qara bylǵary etigim dúrs etip aldyma túse qalmasy bar ma?! Qarasam, apam qasymda kúlip tur. Qolynda sý jańa qyzyl shalma.

«Oı, apataıym-aı!» Qýanyp ketken men bárin umytyp, sý-sý bolǵan qyzyl báteńkeni sheship alyp, esikten dálizge qaraı bir-aq zytyrdym.

— Áı, kórseqyzar balam-aı! — dep, apam maǵan qynjyla qarap, kúrsinip qoıdy. — Osy qyzyl báteńke úshin qandaı mazaladyń meni. Endi túkke keregi joq sıaqty laqtyryp jatyrsyń. Asyqpasań, jaz da keler áli, qyzyl báteńkeni de izdersiń…

---