InfoHub Logo

I

Kúzgi kún edi.

Kún uzaqqa ekpindetip soqqan doly jel keshke qaraı tynyp basylyp, álem júzi qulaqqa urǵan tanadaı múlgýde. Kún batyp bara jatyr. Batar kúnniń sáýlesi qyzaryp shashyrap, dóńes jerler qaraýytyp, qabaǵyn jaýyp túnerip tur. Kúnshyǵys jaqtan qushaǵyn jaıyp kelejatqan qoıý qarańǵylyq — japan dalany uzatpaı búrkeıin dep turǵan sıaqty.

Dala bos. Dala kóńilsiz. Sarǵaıǵan shóp, mal tuıaǵymen qyrqylyp taqyrlanǵan jer júrekti tartpaıdy. Júrek áldeneni izdegen sekildi. Qyzyqty jazdyń qulpyrǵan jerin joǵaltqan sekildi. Mynaý jol janynda jatqan kishkene shalshyq sý — budan eki-úsh aı buryn shalǵyny balbyrap uıysyp jatqan kógal edi. Endi tazdyń basyndaı alamyshtanyp, uıysqan shalǵynnyń ár jerinde bir túbiri ǵana qalypty. Myna túrine qaraǵanda buǵan kógoraı shalǵyn bitti, kemerinen asyp sýy shalqydy dep kim aıtar?

Kún bata Yrysbaıdyń belesine jalǵyz atty qaqpalap; qorapsyz arbaǵa mingese mingen eki adam tyrmysyp kele jatyr. Jekken aty aryq, kóteremge shaldyqqan malsha, súıekteri yrjyńdap túr. Barynsha shaban, shybyrtqy tıse bar denesin salyp jiberip, solqyldap jortqan bolyp, kishkene júrgesin taǵy aıańdaı bastaıdy. Arbany qıqaıa bir jaq ıyǵymen tartyp, bir kózin aıdaýshynyń shybyrtqysynan aıyrmaıtyn sıaqtanady. Shybyrtqy kóterile bergeńde-aq az qymsynyp júre bastaıdy.

Arbadaǵynyń aldyńǵysy domalaq betti, kózi kishirek kelgen, baqa qara kisi. Kóriner-kórinbes murty bar. Erninde bultıǵan nasybaıy. Aǵyn shaýjaılap birer ret shybyrtqylap qoıyp shyrt-shyrt túkiredi. Úndemeıdi. Eki kózi aldynda, tereń oıǵa shomyp kele jatqan kisi sekildi. Bul — besinshidegi pysyq jigit, osy kúngi aýylnaı Kebekbaı edi.

Keıingi otyrǵan qyzyl shyraıly jas jigit, ústinde kóneleý qara shınel, basynda fýrajka, moınynda asynǵan qylysh, arbaǵa aıaǵyn salbyratyp jiberip, qylyshty aldyna kese qoıyp kele jatyr. Bul bolystyq mılısıa. Atymen tanys bolǵylaryń kelse Qaıyń bolysyna kelgeli «Qurymbaı», «Qureke!» atalǵan.

Bular beleske shyqqan kezde shashyraǵan nury semip, kún uıasyna kirdi. Meńireý qarańǵylyq jer júzine qanat jaıǵan sekildi boldy. Túse beris yldı aýyl eken. Munarlanǵan túgin, úrgen ıt, yńyrsyǵan mal. Aýylda ma, álde óristen mal qulatyp kele jatyp pa, bireýdiń án salǵan daýsy estildi.

«Torysham semiredi jem bergende,

Joq edi týk alańym sen degende.

Renjımin, jan serigim, qan jutamyn,

Jerińe ýádeli kelmegende!..»

Keshki án, jigittiń qyzyna ókpelep aıtqan áni — Qurymbaıdyń júregin qytyqtaǵandaı boldy. Júreginiń áldeqaıdaǵy túkpirinde jasyrynyp jatqan eski syrlar birtindep bas kóterip, «men she, men she» dep kóz aldyna elestep kelgen sekildi boldy...

... Ia, ol kezde Qurymbaı jas edi. Jastyǵynyń ústine aýyldyń jabaıy adamynyń biri edi. Qurymbaıdy adam eken dep eleýshi jan joq sekildi edi. Basqanyki basqa bolsyn,

Baıkóbektiń toqalyna ne joq edi? O da teris qarady-aý! Teris qaramaq túgil, «ádira qal, buda adam bolyp, kisige sóz aıtpaqshy ma eken?!» dep nos ta berdi ǵoı. Sol toqaldarǵa osy kúni kóriner me edi? Ne der edi?..

Qurymbaıdyń sol júrgende, jumystan qoly bosaǵanda oılaıtyny ylǵı áıel jaıy. Keıde tósekke jatqanda oıǵa shomyp qıaldanyp, kórer tańdy kózinen atqyzatyn da kúni bolady. Qurymbaıdyń oıynsha dúnıede áıelden qadirli nárse joq. Áıeli bar adam dúnıedegi baqytty adamnyń biri sanalýǵa tıis. Óz aýylyndaǵy Juman kedeılikten zarlanyp muńyn aıtqanda, Qurymbaı kúlýshi edi, «qushaqtap jatatyn qatyny bar, endi buǵan ne kerek eken?..» deýshi edi.

Qurymbaı mılısıalyqqa jetken soń oılaǵan maqsatqa jetem be dep edi. Buryn kózge ilmeıtin áıelder endi, ashylyp sóıleser, tandap júrip bireýin alamyn dep oılap edi. Mılısıa bolǵanyna qazir besinshi aı. Sodan beri kóp el aralady. Qaıyp bolysynda barmaǵan aýyly joq. Ásirese sulý qyzy bar, sulý kelinshegi bar degen úıge arnap ta qonyp júrdi. Biraq arylmaıtyn bir qyrsyq, reti kelgen emes; keıde qyzdyń sheshesi uıyqtamaıdy, keıde qyzymen bóten úıge baryp jatady. Áıteýir Qurymbaıǵa degende syltaý tabylady.

Qurymbaı biraz oıǵa shomyp otyrdy da, basyn keterdi, jan-jaǵyna burylyp qarady.

— Kún batpaı jetemiz dep ediń, ózi alys eken ǵoı, — dep esinep, kerildi.

Obyraǵan shınelin durystap, taqymyna qymqyryp basty.

— Alys emes edi, myna aram qatqyrdyń aıaǵyn baspaı kele jatqanyn kórmeısiń be? — dep Kebekbaı atyn shybyrtqymen sıraqqa tartyp-tartyp jiberdi. Ózi qoqılańqyrap otyryp:

— Kedeıshilik te basyp ketti. Buryn mundaı atty jege qoımaıtyn edim. Tor besti degen atym bolyp edi. Oı janýar, mal edi-aý, aýyzdyǵymen alysyp otyrýshy edi.

Ernindegi nasybaıyn suq qolymen ilip alyp jerge sekirtip jiberdi de, birer túkirinip alyp Qurymbaıǵa qarap kúlimsiredi:

— Asyqpańyz, jetemiz. Búgin yrymymyz jaman emes qoı, retine keler, dedi.

II

— Kúláshjan, quıshy, qanym keýip qalypty ǵoı, — dep kesesin ıterip jiberip Nurjan shapanynyń túımesin aǵytty. Jumystan alqynyp kelgen adam, onyń ústine ystyq shaıdy ishken soń sasyq ter burqyrap shyǵa bastady. Qatparlanǵan mańdaı, ımıgen uzyn tumsyǵy tership, samaıynan, saqalynyń arasynan ter sorǵalap aǵa bastady.

Shaıdy Kúlásh quıyp otyr. Qatyny Merýert, baıy men Kúláshtiń eki ortasynda, julyǵynan shulǵaýy shyǵyp júrgen bastamaly másini kósilip jiberip, qursaýly ala kesemen shaıdy simirip otyr. Baıyna jany ashıtynyn bildireıin degendeı, baıynyń sharshaǵandyǵyna qynjylǵandyq qalpyn kórseteıin degendeı, samaıynan shyǵyp turǵan shashyn jaýlyǵyna tyǵyńqyrap qoıyp, sózge kirdi:

— Baıǵus-aı, óziń qartaıǵanda joq nárseni shyǵynsynbaı-aq jaldap úıdiretin shom edi ǵoı, — dedi.

Keıip otyrǵanda Merýerttiń sózin sham kóretin Nurjannyń ádeti edi. Bul joly da sol kúıge basty. Shyntaqtap jatqan kúsh Merýertke ajyraıyp qarady.

— Esh nárseniń jáıin bilmeısiń-aý, baıǵus, kisi jaldaıtyn ne sıqymyz bar. Aınaldyrǵan úsh sıyr, bir at, bir-eki qoı bar eken. Onyń tóli jaz bitedi. Azǵana egin ishýden artylmaıdy. Borysh bastan asyp jatyr. Bánkeden alǵan bıylǵy 50 somdy tóleıtin ýaqyt ta bolyp qaldy. Kıim joq, tuttaı jalańash otyrǵandaryń mynaý...

Merýert jeńildi. Baıynyń ashýyn jadyrataıyn degen kisideı muńyna sáıkes kele sóıledi.

— Qaıteıin, jazǵan, sharýashylyǵyńdy men bilmeı júrmin, be? Ózińdi aıaǵannan aıtam. Jasyń bolsa 50-den asyp ketti. Jumys isteıtin ne jáıiń bar. Naqurys qylyp berse de qudaı bizden bir jamandy aıady ǵoı... Myna quryp qalǵyr qyzǵa, ákeńe baryp járdemdes, shom úıis desem, ózimdi tálkek qylady... Jumys isteýdiń ne aıyby bar, erteń bireýdiń úıine barǵanda, osyndaı ylǵı boıyńdy baǵyp otyramyn deısiń be?! Kisi úıine barǵanda otymen kirip, kúlimen shyǵarsyń, — dep qyzyna aqyl qylyp aıta bastady.

Kúlásh erke ósken balalary edi. Erkek balalary bolmaǵan sol kempir-shal uldan artyq mápelep ósirip, jastaı jumysqa úıretpegen ózderi edi. Kúlásh esi kirip boıjetkeli ákesin aıasa da, ákesimen qosylyp jumysyn istegisi kelse de, aýylyndaǵy qyzdardyń, qatyndardyń sózderinen qashýshy edi. Kóńilinde «menmendik» bar edi. «Pálensheniń qyzy kedeılikten jumys istep júr», — dep aıtady dep namystanýshy edi. Keıde, ákesin aıap ketkende, joǵarǵy oıyn qatege shyǵaryp, jumys isteýge boı ursa da, endi isteýge kelgende bettemeı shyta berýshi edi. Biraq áke-sheshesin aldaýǵa, olardyń kóńilin tabýǵa usta edi, qandaı jabyrqap otyrǵanda da olardy kúldirip, máz-meıram qylýshy edi. Sheshesi qarqyldap kúlip, qyzynyń minezine rıza bolyp: «qaraǵym, jumys istemeseń de tiri bol!» — deıtin edi...

Lapasta jatqan Joldyaıaq arsyldap úrdi. Esikte sybdyr bilindi. Bireý sıpalaǵandaı boldy. Úı adamdary shaıyn toqtatyp esikke qarady. Keskek baılaǵan qoısha moınyndaǵy qylyshy salaqtap, vıntovkasyn súıretip, Qurymbaı men Kebekbaı artynyp-tartynyp úıge kirdi.

— Kesh jaryq!

Qylyshty, myltyqty kórgenge me, úı ishi úrpıisip qaldy. Ásirese Merýert úrpıdi. Jaqyn arada Sylqymnyń qyzyn mılısıamen kelip alyp ketti degendi esitip edi. Sondaı bir soıqanǵa ushyramasaq ıgi edi dep záresi qalmady.

Syǵyraıyp janǵan bestik shamnyń sáýlesi qara kóleńkelenip, kelgen kisilerdiń betin ashyq kórsetpedi. Áıtse de aýylnaıdy josparlap tanýǵa múmkin edi.

Qonaqtar tórge shyǵyp, qyz aıttyra kelgen sypaıy qudadaı, shirene baryp otyrdy.

— Aýylnaımysyń, aman ba?

— Shúkirshilik.

— Myna jigit kim?

— Bolystyq mılısıa ǵoı.

— Jol bola bersin, qaıdan shyqtyńdar?

— Berekeń aýylynan shyqtyq. Bıylǵy berilgen nálóktiń speskesin kem jazylǵan dep, bolys nanbaı jatyr. Qaıtadan júrip jazyńdar dep, myna kisini jibergen eken, soǵan shyqqanymyz ǵoı, — dedi.

Úıge kirip otyrǵannan Qurymbaıdyń kózi Kúláshta boldy. Aldymen Kúláshtiń mánerli qyzyl taqıasyn kórdi. Qoıý qara shashyn mańdaıynan eki aıyrǵandaǵy aǵarǵan jigin kórdi. Odan temen jazyq mandaıyn, kúlimsiregen qara kezin, murnyn, aýzyn, taǵy-taǵylaryn kórdi. Ásirese kózi, mundaı kózdi Qurymbaı ómirinde kórmegen sekildi boldy. Álde kórdi me eken? Japaqtyń úıine qonatynda boıjetken qyzy shaı quıyp berip edi. Onyń kezi de osy sıaqty emes pe edi? Joq, ol — ólgen balyqtyń kózi sekildi bozǵylt edi. Myna kóz basqa!

Qurymbaı Kúláshtan kózin almady. Qaıta-qaıta qaraı berdi. Bastapqy kezde, qandaı jigit eken dep Kúlásh ta qarap kórip edi, tikireıgen ala kóz, jutyp qoıatyndaı bolyp qadala qoıǵan soń, myna shirkinniń qaraǵany qalaı edi degendeı, oz jumysymen bolyp, sháıin quıa berdi. Qadalyp otyrǵan ala kózdi elemedi, eleý oıynda da bolǵan joq...

Tósek salatyn kez jaqyndaǵanda Merýert qonaqtaryna jón aıtty:

— Aǵalaryń shal. Kásip qylatyn adamymyz joq. Bir-eki qoıdyń telin jazdy kúni soıyp qoıǵamyz. Kúzgi kelgen qonaqtarǵa uıattymyz.

Aýylnaı:

— qoı, — dep ernin jybyr etkizgen boldy...

İİİ

— Qoı deımin, sizge ne bolǵan?! degen Kúláshtiń báseńdeý daýsy shyqty.

Úı ishi qarańǵy. Syǵyraıǵan terezeden azyraq sańylaýsymaq jaryq shalynǵandaı bolady. Úı ishi qalyń uıqyda. Búrgeniń shaqqanyna shydaı almaı aýnap túsip, Nurjan men Merýert qoryldap úıdi basyna kóterip jatyr. Áke-sheshesiniń bas jaǵyndaǵy buryshtaǵy qýysta Kúlásh jatyr edi. O da uıyqtaǵan sekildi edi. Birdeme tós jaǵynda jybyrlaǵandaı bolǵan soń, qymsynyp oıanyp edi.

— Qoı deımin... qoıyńyzshy! — dep kórpesin qymtap jamyldy.

Kúláshtiń bas jaǵyna taman qaltyranyp, júregi alyp-ushyp úńireıip Qurymbaı otyr. Sol qoly jerdi tiregen. Tyrnap alar dep qoryqqan adamdaı ol qolyn eptep qana sozady. Kórpege jaqyndata bergende, Kúlásh jıyrylyp ıgerip tastaıdy.

— Qoıyńyzshy!..

Alqynǵan júrek, yntyqqan tilek erikke qoımaıdy. Úmit úzdirmeıdi. «Adam balasy ǵoı, zaty áıel ǵoı, eljiremes deısiń be, jibimes deısiń be?!» dep oılaıdy. Elestegen tátti úmit baıaǵy qoldy eriksiz taǵy sozdyrady; tilek tilegen qaıyrshydan jaman elerdegi sózin aıtatyn pishinmen ólimsirep sozylǵan baqytsyz qol, jyly kórpege jaqyndaı bergende, áldenendeı belgisiz bir kúsh ıterip kelip tastaıdy.

— Qoıyńyzshy!..

Qurymbaı seskenip, qaltyranyp ketti...

Úı tastaı qarańǵy. Terezeden jyltyrap bir juldyz kórińdi. Juldyzdyń sáýlesimen esik jaqtaǵy pesh aq aıań tartyp buldyrlanǵan sekildi boldy. Pesh janynda buıyǵyp uıyqtap jatqan ala mysyq pyryldap oıanyp, Qurymbaıǵa qaraı aıandady. Janyna kelip eńkeıip otyrǵan Qurymbaıdyń betin quıryǵymen sıpap ótip, Kúláshtiń kórpesine baryp kire bergende, beleń alǵan Kúlásh ony da ıterip jiberdi. Ala mysyq Qurymbaıdyń aldyna kelip tústi. Qurymbaı ala mysyqty syqaq qylǵandaı, «baıǵus-aý, sen túgil meni de jolamaı jatyr», — degendeı ezý tartty. Biraq ala mysyq Qurymbaı sekildi jaltaqtyq qylmady. Kúláshtiń kórpesine qaıtadan baryp kirdi. Kúlásh bul joly tımeı, ala mysyqty kórpesine kirgizdi. «Apyrym-aý, mysyq qurly bolmaǵanym ba? Meni mysyq qurly kórmegeni me?!.» degen oı Qurymbaıdyń mazasyn alyp barady.

Oı teńiz ǵoı. Sharyqtaı otyra aıaqty joǵary saldy. Qurymbaı bir bolys eldiń mılısıasy. Bir bolys el syılap otyr. Áıel túgil erkekter qarsy kelip kórgen emes. Erkektiń de dáýlerimen alysyp kórdi. Qaıyń bolysyndaǵy jeti atasynan ýyzy arylmaǵan Byqyrıa deıtin kisi urlyqpen bylǵanyp, sony ustaýǵa týra kelgende, eńkildetip aldyna salyp aıdap-aq kelgen Qurekeń edi. Bir aýylnaı el jınalyp, bir kún qondyr dep suraǵanda da, kónbegen kisini osy zańdy durys oryndaýda, atqa minerlerdiń, jýandardyń aldaýyna ermeýde Qurymbaı báıge alyp-aq júrgen joq pa? Mılısıa bastyǵy munyn, qyzmetin jaqsy dep maqtap otyrǵan joq pa?.. Endeshe... Osynsha qarysqandaı bul qyzǵa ne joq?

Qurymbaı ashýǵa da mingisi keledi. Biraq, belgisiz bir kúsh erkin alyp, jýasytady. «Ashýdan esh nárse ónbeıdi, jalynyp baq» degendeı bolady.

Nege ekenin ózi de sezbedi, Kúláshtiń janyna janaı jatty. Kúláshtiń jastyǵynyń buryshyna basy tıgende, boıy erip ketken sekildendi... «Osyndaı qarańǵy túnde, mynadaı boıjetken qyzdy qushaqtap jatsa, sodan qyzyq ne bar eken?!» — degen oı basta taıtalasyp jarysyp, mazany alyp barady...

Alqynyp, tyǵylyp zorǵa degende únin shyǵardy:

— Siz meni tanymaı jatyrsyz ǵoı deımin...

— Joq, tanydym.

— Endeshe zamandas emessiz be?

— Bolsa qaıtedi? Álde, zamandastyǵyńyzdy satasyz ba?

— Satpaımyn ǵoı... Zamandastyqqa laıyq is qylsaq deımin.

— Men tilemeımin...

— Siz meniń sózime túsinbeı jatyrsyz. Meni — eldegi jabaıy jigittiń biri dep oılaısyz. Onyńyz qate. Men is basyndaǵy adammyn. Men áıel zatyn teńgerýge qarsy emespin. Sonyń úshinde ózim kelip otyrmyn. Meniń oıym... Meniń oıym... dep Qurymbaı sózin aıaqtamaı toqtady. Óziniń ne aıtqanyn, ne aıtaıyn degenin bilmedi.

— Jumys adamysyz ǵoı, uıqyńyzdan qalmańyz, baryp jata qoıyńyz, — dep Kúlásh irge jaqqa aýnap jatty.

«Jumys adamysyz ǵoı...» Bul ázildegen SÓZ emes pe? Ia, ázildegen sóz. Ázilge kelgen soń endi ne turys bar? — dep oılady... Jatqan kúıi basqa sózdi qoıyp, qushaqtaı berem degende, beleń alǵan Kúlásh seskenip, qolyn kóterip qalǵanda, Qurymbaıdyń mańdaıyna saq ete qaldy. Basyn beleń alǵan atsha Qurymbaı kekel etkizdi. Tula boıy sýynyp, denesine sýyq sýdy quıyp jibergendeı boldy. Ne bolǵanyn, ne qylǵanyn sezbesten qaltyraǵan kúıi az-kem tónip otyrdy da, jyljyp tósegine keldi.

Aýylnaı uıyqtaǵan joq eken:

— Nemene, is bitti me? dedi.

Qurymbaı kórpesin jamylyp jatyp kúrsindi:

— Bolmaıdy! — dedi.

IV

— Qane, Nureke, malyńyzdy aıta qoıyńyz, — dep aýylnaı qysyp barady.

Nurjannyń tezek qalalynyń ishinde on shaqty adam qatarynan otyr. İshinde baısymaq Kárim, súbe bı — Dáýit bar.

Nurjan kibirtiktep múdirdi. Syrttan qarap turǵan Merýert tóze almady bilem, shalyna bolysa bastady.

— Aýylnaı qaınym, aǵańdy tym qysyp kettiń ǵoı. Bir-eki sıyr men bir attyń baryn eziń de bilesiń, onyń nesin suraı beresiń?

— Men eshkimniń malyn túgendep júrgenim joq. İsimde ne baryn men bilmeımin. Aıtqandaryńdy jazam, aıtpaı jasyrsańdar, erteń aıyp tartasyńdar, malyń qazynaǵa túsedi...

— Onyń durys qoı, biraq mende jasyrylyp otyrǵan mal bar ma? Bir-eki qaranyń esebi óz qolynda. Meni qysa bergenshe, myna Kárim, Dáýitter de otyr, aldymen solardan-aq surasaıshy...

— Baı-baı, Nurjan-aı, qyrshańqy tiliń qalmaıdy-aý. Bireýdi shaldyrmaı-aq óz malyndy jazdyra berseıshi, — dep Dáýit keıip qaldy.

— Qaınym-aý, neni jazdyr deısinder?

— Jazdyr, ana qoıyńdy! Ákeńe as beresiń be? Qazynadan mal urlaıtyn qaıdan shyqtyń?

— Óziń jazdyrmaısyń, seniń qoıyń joq shyǵar?

— Men qoıymdy kimge jazdyratynymdy bilem.

— Biz de bilemiz.

— Áńgimeni qoı, jaz, myna Nurjannyń eki qoı, bir eshkisi bar.

— Endeshe myna bıdiń on bes qoıy bar, aldymen sony jaz, — dep Merýert taǵy kılikti. Dáýit Merýertke ala kózimen qarady...

Aýylnaı Nurjannyń eki qoı, bir eshkisin jazdy. Dáýittikin jazbady. Dáýittikin jazǵan-jazbaǵanyn Nurjanda, Merýert te qazbalap suraı almady. Dáýittiń ashýly ala kózi óńmenderinen ótip ketti. Bir pálege ushyratar dep qoryqty...

V

Nárse-qarasyn alyp, júreıin dep jatqanda úı janynda turǵan Kúláshqa Qurymbaı kezdesip qaldy. Kúlásh jymıyp kúldi. Túnde ashýlansa da, nege ekenin ózi de bilmeı kúldi.

Qurymbaı da kúldi.

—Túndegige ashýlandyńyz bilem.

—Joq,ashýlanǵan joqpyn.

—Ashýlanbasańyz aıyp alýyńyzdyń jóni qalaı?

—Qaıdaǵy aıyp?

—Aıyp emeı ne, baılardyń júzdegen qoıyn kórmeı, bizdiń úıdiń eki qoıyn jazyp ketip otyrsyzdar, tóreligińdi bylaı qoıalyq, munyń tipti jigitshiligińe laıyq emes qoı.

Qurymbaı apalaqtap qaldy. İstegen isteriniń burystyǵyn jańa sezgendeı boldy. Uıalyp betinen oty shyqty...

Arbaǵa minip, aýyldan shyǵa bergende Qurymbaı artyna qarady. Eki shelegin ıyǵyna salyp Kúlásh sýǵa ketip bara jatyr edi.

—No, malades qyz eken, átteń oqymaı qor bolǵan eken!.. dedi.

***

Aýylǵa salyq qaǵazy kelgende, kim jazǵany belgisiz, Dáýittiń on bes qoıyna salyq salynyp keldi. Muny estigende Nurjan mıyǵynan kúlip:

— Oqasy joq, kóppen birge tarttyń ǵoı, — dep kenelip qaldy.

Shaı quıyp otyrǵan Kúláshtiń esine Qurymbaı tústi. Qurymbaıdyń keterde uıalǵany, qulaǵyna deıin qyzaryp, qaıyryp jaýap bere almaǵany kóz aldyna keldi, óz-ózinen jymıyp:

—Qalaı da jigit eken, jarady! dep rıza boldy.

1925.

---