InfoHub Logo

Almatyda qazaq mýzykasyn zertteýshi kórnekti ǵalym, kompozıtor Ahmet Jubanovqa arnalǵan jańa kitaptyń tusaýy kesildi.

Kitap ál-Farabı atyndaǵy QazUÝ-dyń «Ónegeli ómir» serıasy boıynsha shyǵarylǵan. Áıgili kompozıtor, ónertaný ǵylymynyń doktory, profesor Ahmet Jubanovqa arnalǵan kitaptyń tusaýkeser rásimine akademık Ajar Jubanova, Abaı atyndaǵy opera jáne balet teatrynyń dırektory Asqar Bóribaev, M.Áýezov atyndaǵy ortalyq murajaıdyń dırektory Dıar Qonaevtar qatysty.

Ahmet Jubanovtyń qyzy Ajar Jubanova kitaptyń shyǵýyna muryndyq bolǵan Ulttyq ýnıversıtetke jáne de úles qosqan barsha azamattarǵa alǵys aıtty.

«Ahmet Qýanuly óziniń sońynan talaı talantty shákirtter tárbıelep, qazaqtyń mýzyka óneriniń damýyna talmaı eńbek etti. Qazaqtyń halyq mýzykasyn erekshe súıip, ómiriniń sońyna deıin zerttep ótti. Sońynan kóptegen etnografıalyq zertteýler, kórkem ocherkter men halyq shyǵarmashylyǵynan myńnan astam án men kúıdi jazyp alyp, notaǵa túsirdi. Ahmet Jubanov Qazaq mýzykalyq mádenıetin qalyptastyrǵan tulǵa, jáne de búgingi «Ónegeli ómir» serıasymen shyqqan kitap urpaqtarymyzǵa altyn mura bolyp qalary aqıqat», - dedi ol.

Jıyn barysynda kópshiliktiń nazaryna kompozıtordyń ómiri men shyǵarmashylyǵyna arnalǵan derekti fılm kórsetildi.

QazAqparat

---