InfoHub Logo

Týǵan kún ıesi perzentiniń tilegi

Qymbatty Áke!

Siz qazir 80 jastyq ómir asýynyń bıigine kóterilip, biz úshin burynǵydan da asqaqtaı, burynǵydan da mártebeli bola túskendeı kórindińiz. Siz osynaý júrip ótken ulaǵatty jolyńyzda perzentterińiz ben jaqyndaryńyz úshin árdaıym da tárbıe mektebi bola aldyńyz. Biz sizdiń ónegeli isterińizden jarqyn sáýle, ákelik júregińizden jyly meıirim sezinip er jettik. Tálimi kóp isterińizden úlgi ala otyryp, Sizdiń asqar taýdaı bolmysyńyzǵa eliktep óstik.

Sizdi perzenttik júrekpen jaqsy kórdik. Endi, mine, 80 jasqa tolyp otyrǵan sátińizde de osynaý Áke kóńilden daryǵan meıirim men tálim-tárbıeni eske túsirip, bizdiń ózimiz de óz-ózimizge qaıta bir esep bergendeı kúı keshtik. Ata-ana aldyndaǵy paryzymyz ben qaryzymyz ushan-teńiz ekenin sezingendeı boldyq. Ata men ananyń eńbegi úshin olardyń óz perzentteri qandaı qurmet kórsetse de artyq emes eken.

Áke!

80 jas mereıtoıyńyz qutty bolsyn! Ár ýaqytta qajymaı-talmaı óz ortańyzdyń qadirmendi aqsaqaly, óz perzentterińizdiń aıbyndy aqylshysy bolyp júre berińiz!
Biz sizdi maqtan tutamyz, Áke!

İzgi tilekpen: ulyńyz (qyzyńyz).

*** *** ***
Ujym ıesiniń sózi

Qurmetti________

Siz búgingi kúnde artyńyzǵa mándi de, maǵynaly iz qaldyryp, 80 jastyń salıqaly bıigine kóterilip otyrsyz.

Ómir ıiriminiń san taraý tustarynda qashanda Ákeler joly artyndaǵy óskeleń urpaqqa ǵıbratty ǵumyr joly bolyp, olardyń arman bıigine tálimdi baǵytty nusqap otyrdy. Sandaǵan urpaqtar osyndaı taǵylymdy ǵumyr jolymen shyńdala túsip, aldyńǵy aǵa býynnyń mándi de ónegeli isterin basshylyqqa alyp erjetken edi.

San myńdaǵan urpaq legi dańqty Ákeler jolynyń jarqyn tustaryn boılaryna sińirip, ony dástúr jolymen keıingi býynǵa tabystap otyrdy.

Ómirdiń san taraý soqpaqtarynda artyndaǵy urpaqqa iri bolmysty, kesek isterimen kórine alǵan Ákeler qatary árdaıym da az bolmaǵanyn eske alyp, qurmet tutsaq, Siz osyndaı qurmetke ıe jansyz.

Halqymyz qashanda óziniń úlkenderin qadir tuta bilip, olarǵa degen syılastyq pen iltıpatyn úzgen joq. Taǵylymdy da qasıetti ári qasterli isterine saı halyq óz qarıalaryn aqsaqal dep qurmettep otyrsa, mine, Siz osyndaı ónegeli de iltıpatty ataqqa laıyqty ómir jolymen júrip óttińiz.

Búgingi 80 jasqa tolyp otyrǵan mereıtoı bıigińizde de osynaý jarqyn da ónegeli isterińiz ózińizdi úlgi tutar keıingi býynǵa bar bolmysymen taǵy da bir jarqyraı kóringendeı. 80 jastyń asqaq bıigine qarıaly da qazynaly qalpyńyzben jetip otyrǵan Sizge dál búgingi kúni qandaı da bir qurmetti lebizderdi arnasa da artyq emes.

Qurmetti toı ıesi!

80 jas mereıtoıyńyz qutty bolsyn! Ózińizdiń jalǵasyńyz bolyp otyrǵan urpaqtaryńyz ben jaqyndaryńyzdyń arasynda ónegeli aqsaqal, tálimdi aqylshy bolyp aman-esen júre berińiz. Sizdiń ómirlik baı tájirıbeńiz búgingi jas býyn úshin de árdaıym qajetti ári qasterli qundylyq bola bermek.

80 jas mereıtoıyńyz taǵy da qutty bolsyn!

---