InfoHub Logo

Dúnıede adam kúletin, adam jylaıtyn, adam uıalatyn, adam jıirkenetin, adam laǵynet aıtatyn qylyqtar, is-áreketter jasalyp jatyr. Bul áreketterdiń ár jaǵynda meıirimge, mahabbatqa, jylylyqqa zárý adam tur.

Alý úshin berý kerek. Bul - zańdylyq. Tek ala berý adamdy jalmaýyz etedi. Egosyn ǵana toıdyra bergen adamnan qasıet kete bastaıdy. Sosyn onyń ornyn eshteńemen toltyra almaısyń. Eń súıikti dúnıe de, bıik oryndyq ta, ádemi kıim de, ataq ta, basqa da ýaqytsha jubanysh.

Nege adamdar tapqan taıanǵanyna kıim ala beredi, nege dúnıe jınaı beredi, nege únemi dúken aralap júredi, joq bolǵannan emes, kóbi egosyn qanaǵattandyrý úshin. Ol qýanysh ta uzaqqa sozylmaı, bitip qala beredi. Sosyn taǵy kerek, kerek bolmasa da kerek. Keıde nege bulaı ekenin adamnyń ózi de túsinbeıdi. Sebebi, rýhanı álemdegi jyrtyq jamalmaı tur. Bos tur. Qýys álem tek óz dúnıesimen tolýy kerek. Ony basqamen toltyryp, aldaı almaısyń. 

Adamnyń qolynan bári kelse de, ózine áli kele bermeıtin jaratylys. Adamdardyń pendeshiligin baıqaǵanda, osy jasqa deıin túk bitirmegenine, sanasyn ósire almaǵanyna qynjylasyń. Sebebi, mıdy kóp tyńdaıdy. Egonyń aıtqanymen júredi. Júrekti, Jaratqandy qınalǵanda ǵana eske alady. Egoızmniń shyrmaýyna túsip, matalyp, býynyp, “óleıin” dep jatqanda júrektiń, meıirimniń bar ekenin eske alady. Jaratqanǵa jalbarynady. Kóp jaǵdaıda esegi sýdan ótken soń burynǵy “taz” qalpyna qaıta túsedi. Mundaı sheńberden shyǵý úshin sanany oıatý kerek, júrektiń kózin ashý qajet. Qasıetterge oralý kerek. Quldyqtan bosap, tynysty ashý qajet. 

Ózin jaqsy kórmegen adam bar jaýapkershilikti ózgeniń moınyna ilgendi jaqsy kóredi. Qudaı jaýapty, taǵdyr jaýapty, basqa adamdar, tek siz emes. Haýa anany azǵyrǵan jylan jaýapty. Jaýapkershilikti ózgege ilý degen úlken jaýapsyzdyq. Jaýapkershilikten qashý adamnyń jeke tulǵa bolyp qalyptasýyna kereǵar áser etedi. Adam jaýapkershilikke ózin jaqsy kóre bilgen kezde keledi. Ár adam óz jaýapkershiligine qýanyp, soǵan saı ómir súredi. Jaýapkershilikti ózgege artý ýaqyt joǵaltý. Erkindigińdi urlatý. Ózgeniń táýeldiligine túsý. Jaýapty bolý adamǵa qýat-kúsh syılaıdy. Adamnyń tamyryn tereńge tartýǵa múmkindik beredi. Jaýapkershilikti alýdyń qaınar bulaǵy ózińdi jaqsy kórýden bastalady.

Sananyń eń bıigine jetken adam - ózin jeńgen jan. Myqty adam dep sony aıtady. Qalǵan jetistik dep júrgenimiz - báriniń qolynan keletin dúnıe.

---