InfoHub Logo

Bir baıdyń qyzyn uzatqanda qyzdyń mal-múlik jasaýyna qosyp bir kedeıdiń dombyrashy jalǵyz qyzyn kúń retinde shańyraqqa mingizip beredi. Baı bıligine qarsy turar dármen joq, ata saltyn buzarǵa qaqysy joq, sorly qyz jylaı-jylaı kúńdikke ketedi. Qyzdyń «qamqorym, súıenishim» deıtini — jalǵyz aǵasy eken. Kúńdikke attanyp bara jatqan qaryndasymen jylap qoshtasyp turyp:

— Táńir salǵan taýqymetti kórmeske lajymyz joq. Ekeýimizdiń bir júrgenimizdi de kóp kórgen eken. Biraq «kebenek kıgen keledi» degendeı álde de úmitim bar. Barǵan elińniń ıgi jaqsylary bas qosyp otyrǵan bir sátti paıdalanyp uıalmaı, ımenbeı ruqsat sura da, «Sary ózen» degen kúı shertip ber. Sáti bolsa osydan yńǵaı biliner. Kúıdi týǵan jeriń «Sary ózenge» arna, zaryńdy qos. Jan tebirenter kúı shyǵarý qolyńnan keledi, — deıdi aǵasy. Qyz kúń atanady da jat el, jat jerge barady. Kórgeni mehnat bolady. Baıdyń otymen kirip, kúlimen
shyǵady. Sary ýaıym, bitimi joq kóp kúıbeń, jigerin jegideı jep, júregin muńǵa toltyrady. Óstip júrgen qapastaǵy kúnderdiń birinde, ol eldiń ıgi jaqsylarynyń basy qosylyp, baı úıine jıylady. Óziniń muń-zaryn, týǵan jerge degen saǵynyshyn eki ishekti dombyrada sóıletip qoıǵan qyz, ruqsat surap ıgi jaqsylar otyrǵan úıge kiredi. Sary qymyzdy sýsha sapyryp kúni boıy ishse de, toıymdyq tappaı bórtip otyrǵan ıgi jaqsylar qyzdyń jańa kúıimdi shertip bereıin degenin estip eleń etisedi.

Qyz kúıin sherte jónelgende kúńniń ónerine tańdanǵan ıgi jaqsylar bas shulǵysyp, tus-tustan qolpashtap daýryǵysyp qalady. Kúıdi tyńdap bolǵannan keıin qyzdan kimniń kúıi ekendigin suraıdy. Sonda qyz: «Taǵdyr maǵan týmaı jatyp mehnat syılady. Etegine jarmasyp áke artyna ergem joq, ana sútin toıa emgem joq, qos báıteregimnen jastaı aıyrylyp, jetim qaldym. Baı esiginde kún keshtim. Endi kózimdi ashyp, jan-jaǵyma qarap otyrǵanda kórip otyrǵanym mynaý. Shańyraqqa minip kep kúń atandym. Artymda kóz jasymen óńirin jýyp jalǵyz aǵam qaldy, birge ósken muńdas qurbylarym qaldy, móldir sýyn simire iship, kirimdi jýǵan «Sary ózen» qaldy. Osylardy oılasam, ózegim órtenip qaıǵy basady. Ózegimdi sary ýaıym jaılady, solarǵa degen saǵynyshym edi. Kúı atyn «Sary ózen» atadym», — deıdi.

Igi jaqsylar qyzdyń ónerine razy bolyp kúńdikten bosatyp eline qaıtardy.

---