InfoHub Logo

Qorqyt jıyrma jasqa tolǵanda aq saqaly beline túsken, aq taıaǵy kók tiregen áýlıe kelip, taǵy da túsinde aıan beredi: «Ýa, Qorqyt, bul jaryq dúnıede saǵan qyryq jyl ǵumyr mańdaıyńa jazylǵan, odan artyq júrmeısiń!» deıdi. Oıana kelse túsi eken, áýlıeniń aıtqan sózi óńindegideı qulaǵynda qalyp qoıady.

Osydan keıin-aq Qorqyt qatty tiksinip, ólmeýdiń amalyn izdep, Jelmaıasyna minip, dúnıeni kezip ketedi.

Kúnderdiń bir kúninde Qorqyt dala kezip kele jatsa úpir-shúpir bolyp jer qazyp jatqan bir top adamǵa ushyrasady. «Aý, bul qazyp jatqandaryń ne?» — dep jón surasa, álgiler: «Qorqyt áýlıeniń kórin qazyp jatyrmyz!» dep jaýap beredi. Muny estigen Qorqyt Jelmaıasyn buryp, kelesi bir qıyrǵa bet túzeıdi. Biraq sharshap-shaldyǵyp, endi buıda tartyp tynyǵam degende aldynan taǵy da kór qazýshylar ushyrasady. Jón surasa kelse, olar da Qorqyttyń qabirin qazýshylar bolyp shyǵady. Osylaısha, Qorqyt ólimnen qashyp, dúnıeniń tórt buryshyn sharlaǵanymen, aldynan ózine arnap kór qazýshylar kezdese beredi. «Qaıda barsań — Qorqyttyń kóri!» degen eski sóz osydan qalypty deıdi.

Sodan ábden taryǵyp, tıtyqtaǵan Qorqyt jer ortasyna jetsem, janym qalar dep, óziniń týǵan jeri Syrdyń jaǵasyna jetedi. Sol jerde Jelmaıasyn soıyp, onyń terisimen qańsyǵan qara qobyzyn qaptaıdy. Sonan soń sýdyń betinen kór qazylmas dep, Jelmaıanyń jabýyn Syrdyń sýyna jaıady da, sonyń ústine jaıǵasady. Sol jerde osyndaı haline qamyǵa otyryp, qara qobyzyn muńdy sarynǵa salǵan eken. Osy sarynnyń bir qaıyrymy urpaqtardyń esinde saqtalǵan ǵoı.

Qorqyt Syr sýynyń ústinde júz jyl boıy ómir súripti deıdi. Bul ýaqyt ishinde qobyzyn toqtaýsyz sarnatyp, ajaldy mańaıyna jolatpapty deıdi. Qorqyt qobyz tartqanda jel tynyp, sý aǵysyn toqtatyp, jan-janýar uıyp tyńdaıtyn bolsa kerek.

---